मुंबई : शेअर बाजारातून विदेशी संस्थांनी गुंतवणूक काढून घेतल्याने शुक्रवारी डॉलरचा भाव ९१.९४ वर आला. जानेवारी महिन्यात विदेशी गुंतवणूक संस्थांनी तब्बल ३६ हजार ५०० कोटी रुपये शेअर बाजारातून काढले आहेत. त्यातच आयातदारांकडून डॉलरची मागणी वाढल्याने रुपयावरील दवाव आणखी वाढून एका डॉलरचा भाव ९१.९४ रुपयांवर गेला आहे. शेअर बाजारावरही त्याचा परिणाम दिसून आला आणि सेन्सेक्स ७६९ अंकांनी, तर निफ्टी २४१ अंकांनी घसरला.
गेल्या सप्ताहात डॉलरच्या तुलनेत रुपया १.१८ टक्क्याने घसरला असल्याचे स्पष्ट झाले आहे. गेल्या सहा महिन्यांत एका सप्ताहात रुपयाची झालेली ही सर्वात मोठी घसरण ठरली आहे. तसेच, जानेवारी महिन्यात डॉलरच्या तुलनेत रुपया २.३ टक्क्यांनी कमकुवत झाला आहे. गत सप्ताहातील पहिल्या तीन सत्रांतील घसरणीनंतर गुरुवारी शेअर बाजार अर्ध्या टक्क्याने वधारला. मात्र, नफा कमावण्यासाठी झालेली शेअर विक्री, विदेशी संस्थांनी काढून घेतलेली गुंतवणूक, यामुळे शुक्रवारच्या सत्रात दोन्ही शेअर निर्देशांक घसरले.
सेन्सेक्स ७६९ आणि निफ्टी निर्देशांक २४१ अंकांनी खाली आला. सेन्सेक्सच्या घसरणीमुळे बीएसईतील गुंतवणूकदारांचे सहा लाख कोटी रुपयांहून अधिक नुकसान झाले. तसेच, विदेशी संस्थांच्या शेअर विक्रीने डॉलरची मागणी वाढल्याने रुपया शुक्रवारी ९२ रुपयांच्या घरात गेला आहे. बीएसई स्मॉल कॅप आणि मिड कॅप निर्देशांकात अनुक्रमे १.६ आणि २.२ टक्क्यांनी घसरण झाली. अदानी पोर्टस्, इटर्नल, इंडिगो आणि अॅक्सिस बँकेच्या शेअर भावात मोठी घसरण झाल्याने सेन्सेक्सचे सर्वाधिक नुकसान झाले.
टेक महिंद्रा, इन्फोसिस, एचयूएल, टीसीएस आणि आयसीआयसीआय बँकेतील गुंतवणुकीत वाढ झाल्याने सेन्सेक्सच्या घसरणीला लगाम बसला. निफ्टी रिअल्टी निर्देशांक ३.३४ टक्क्यांनी गडगडला. निफ्टी पीएसयू बँक निर्देशांकात २. २७ टक्क्यांनी घसरण झाली. निफ्टी मिड कॅप आणि स्मॉल कॅप निर्देशांक अनुक्रमे १.८ आणि १.९५ टक्क्याने खाली आले.
ग्रीनलैंड प्रकरणाचे परिणाम
अमेरिकेने ग्रीनलँडवर दावा सांगितल्यानंतर जगभरातील गुंतवणूकदारांमध्ये अस्वस्थता निर्माण झाली. त्याचे पडसाद भारतीय शेअर बाजारातही उमटले. मुंबई शेअर बाजारात सोमवार ते बुधवारच्या सत्रात सेन्सेक्स दोन हजार अंकांहून अधिक गडगडला. त्यानंतर गुरुवारी निर्देशांक ३९७ अंकांनी वाढला. शुक्रवारी पुन्हा सेन्सेक्स ०.९३ टक्क्याने घसरून ८१,५३७ अंकांवर आला.
रुपयाने फक्त वीस दिवसांत ओलांडली ९१ ची पातळी
नववर्षाच्या सुरुवातीपासूनच रुपया दवावाखाली आहे. डिसेंबर २०२५ मध्ये रुपया प्रथमच ९० च्या पातळीच्या पुढे गेला होता. आता अवघ्या २० दिवसांत त्याने ९१ ची पातळीही ओलांडली आहे. बाजार तज्ज्ञांचे मत आहे की, जागतिक तणाव आणि जगभरातील शेअर बाजारांमधील अस्थिरतेमुळे गुंतवणूकदार सोने आणि डॉलरमध्ये गुंतवणूक वाढवत आहेत.
