IMC Leadership: मुंबईतील प्रमुख उद्योग संघटना असलेल्या आयएमसी चेंबर ऑफ कॉमर्स अँड इंडस्ट्रीने 2026-27 या वर्षासाठी आपल्या नव्या पदाधिकाऱ्यांची घोषणा केली आहे. या निवडीत प्रा. महेंद्रकुमार चौहान यांची अध्यक्षपदी निवड करण्यात आली असून रमेश नारायण यांची उपाध्यक्षपदी निवड झाली आहे.
सध्या उपाध्यक्ष म्हणून कार्यरत असलेले प्रा. चौहान जून 2026 मध्ये होणाऱ्या वार्षिक सर्वसाधारण सभेत औपचारिकपणे अध्यक्षपदाची जबाबदारी स्वीकारणार आहेत. या निवडीबद्दल कृतज्ञता व्यक्त करताना त्यांनी सांगितले की, 118 वर्षांच्या समृद्ध परंपरेच्या संस्थेचे नेतृत्व करणे ही आयुष्यातील मोठी संधी आहे. तसेच, या संस्थेच्या वारशाला पुढे नेताना गांधीवादी तत्त्वांवर आधारित संवाद साधून सदस्य, उद्योगक्षेत्र आणि सरकार यांच्याशी मजबूत नातेसंबंध निर्माण करण्याचा त्यांचा प्रयत्न राहील.
नवीन उपाध्यक्ष रमेश नारायण यांनीही या निवडीबद्दल आनंद व्यक्त केला. त्यांनी सांगितले की, एकमताने उपाध्यक्ष म्हणून निवड होणे हा सन्मान असून IMC ही संस्था उद्योगक्षेत्रात महत्त्वाची भूमिका बजावत आहे. धोरणात्मक सल्ला, शाश्वत विकासावर भर आणि 5,000 हून अधिक सदस्यांना विविध उपक्रमांद्वारे जोडून ठेवण्याचे काम IMC करत असल्याचे त्यांनी नमूद केले.
IMC च्या ‘लेडीज विंग’ आणि ‘यूथ विंग’सारख्या सक्रिय घटकांमुळे संस्थेचे जाळे अधिक बळकट झाले असून, आगामी काळात उद्योगक्षेत्रात सकारात्मक बदल घडवून आणण्यासाठी नव्या नेतृत्वाकडून अपेक्षा व्यक्त केल्या जात आहेत.
