Laxman Hake Emotional Post : मराठा आरक्षणासाठी मनोज जरांगे-पाटील यांनी मुंबईत ऐन गणोशोत्सवात आंदोलन केले. या आंदोलनावेळी आणि यानंतर जरांगे-पाटील यांच्या मागणीला ओबीसी नेते लक्ष्मण हाके यांनी विरोध केला. मराठा समाजाला स्वतंत्र आरक्षण आहे. त्यांना ओबीसी प्रवर्गात आरक्षण देणे अन्यायकारण असल्याची आक्रमकपणे भूमिका त्यांनी मांडली. यानंतर आपल्याला फोनद्वारे धमक्या असल्याचा दावा हाके यांनी केला होता. तसेच अन्य ओबीसी नेते हाके यांना साथ देत नसल्याचीही चर्चा होती. यानंतर आता त्यांनी एक भावनिक पोस्ट करत पुन्हा एकदा सर्वांचे लक्ष वेधले आहे.
लक्ष्मण हाके यांनी आपल्या पोस्टमध्ये म्हटलं आहे की, "मी प्रामाणिकपणे भांडतोय, ओबीसी भटके एकत्र आले पाहिजेत म्हणून, आपले हक्क अधिकार टिकले पाहिजेत म्हणून, मी एक मेंढपाळ धनगराचं पोरगं आहे, मी बॅनर छापू शकत नाही, गाडी ला पैसे देऊ शकत नाही, भले मोठे स्टेज लावू शकत नाही, कुणाला चहा पाजू शकत नाही, हे माहित असूनही तुम्ही आजपर्यंत मला साथ दिलीत, उपोषण आंदोलन असो की मोर्चे, एल्गार मेळावे असोत किंवा रॅली, तुम्ही ताकदीने माझ्या पाठीशी उभे राहिलात, मला पाठिंबा देत राहिलात, मी तुमचे आभार मानावेत तेवढे कमी आहेत, मी ओबीसी च्या बाजूने बोलत गेलो, भांडत गेलो, ओबीसीच्या छोट्या छोट्या जात समूहाना जोडत गेलो, लाखो माणसं जोडली पण शत्रू ची संख्या सुद्धा वाढत गेली, हल्ले झाले, झेलले, पण आत्ता सहन होत नाही, उद्या दैत्यानांदूर ता पाथर्डी जि अहिल्यानगर च्या ओबीसी मेळाव्यानंतर मी माझी भूमिका जाहीर करेन. मी आंदोलनात असेन किंवा नसेनही तुम्ही जेवढी साथ दिलीत त्याबद्दल जाहीर जाहीर आभार मानतो, असेही हाके यांनी म्हटले आहे.
एकीकडे लक्ष्मण हाके यांची भावनिक पोस्ट चर्चेत असताना आज (दि. २७ सप्टेंबर) सकाळी लक्ष्मण हाके यांच्या गाडीवर अहिल्यानगरमध्ये अज्ञात तरूणांनी हल्ला केल्याची घटना समोर आली आहे. मराठा आणि ओबीसी आरक्षणावरून महाराष्ट्रातील राजकीय आणि सामाजिक वातावरण तापलेले असताना हा प्रकार घडला आहे.
