कुर्ला ः बील न भरल्याने गॅस जोडणी बंद करत असल्याची बतावणी करून एका व्यक्तीच्या बँक खात्यातून ऑनलाईन फसवणूक करणाऱ्या आरोपीने दोन लाख रुपये काढल्याचा प्रकार घाटकोपर येथे समोर आला आहे. याबाबत घाटकोपर पोलिसांनी गुन्हा दाखल करत आरोपीचा शोध सुरू केला आहे.
इराण-इस्राईल युद्धामुळे सध्या गॅस सिलेंडरचा मोठा तुटवडा निर्माण झाला आहे. याचाच फायदा सध्या ऑनलाईन फसवणूक करणारे भामटे घेत आहेत. घाटकोपर परिसरात राहणारे राजेश गाला (51) यांना देखील दोन दिवसांपूर्वी अशाच प्रकारे एका अनोळखी इसमाने फोन केला. आपण महानगर गॅस कार्यालयातून बोलत असल्याचे सांगत, आरोपीने तुम्ही बील न भरल्याने तुमची गॅस जोडणी बंद करत असल्याचे सांगितले.
मात्र मागच्या महिन्यात बील भरले असल्याचे गाला यांनी आरोपीला यावेळी सांगितल्यानंतर आरोपीने बील अपडेट झाले नसल्याचे त्यांना सांगितले. तत्काळ बील अपडेट करा अन्यथा गॅस जोडणी बंद करण्यात येईल, अशी बतावणी यावेळी आरोपीने केली.
अशी झाली फसवणूक
गाला यांनी अपडेटची प्रक्रिया आरोपीला विचारली असता त्याने त्यांना एक लिंक पाठवली. ही लिंक उघडल्यानंतर गाला यांनी त्यांच्या बँक खात्याची काही माहिती यामध्ये भरली. त्यानंतर काही वेळातच त्यांच्या बँक खात्यातून एक लाख 88 हजार रुपयांचा व्यवहार झाल्याचे त्यांना समजले. फसवणूक झाल्याचे लक्षात येताच त्यांनी याबाबत घाटकोपर पोलीस ठाण्यात तक्रार दाखल केली.
