मुंबई : जुजबी मराठी शिकण्यासाठी अमराठी रिक्षा आणि टॅक्सी चालकांना एक वर्षाची मुदतवाढ देण्याची घोषणा मुख्यमंत्री देवेंद्र फडणवीस यांनी गुरुवारी केली आणि मुंबईसह राज्यभरातील अमराठी रिक्षा आणि टॅक्सी चालकांना मोठा दिलासा दिला.
या चालकांना मराठीचे जुजबी ज्ञान असणे परिवहन विभागाने बंधनकारक केले होते. त्यासाठी तपासणी मोहीम सुरू करून ज्या चालकांना मराठीचे ज्ञान नाही अशांना नोटिसा जारी केल्या. यानंतरही मराठी आले नाही तर कारवाई करण्याचा इशारा परिवहन मंत्री प्रताप सरनाईक यांनी दिला होता. सरनाईक हे मराठी सक्तीवर ठाम असताना त्यांचा निर्णय मुख्यमंत्र्यांनी फिरवला.
अमराठी टॅक्सी आणि रिक्षा चालकांची संघटना आम्हाला भेटली. आम्हाला वेळ वाढवून द्या. आम्हाला इतक्या तातडीने मराठी भाषा शिकणे शक्य नाही, असे त्यांचे म्हणणे होते. त्यानुसार मराठी शिकण्यासाठी या रिक्षा आणि टॅक्सी चालकांना एक वर्षाची मुदतवाढ देण्यात येईल, असे मुख्यमंत्री म्हणाले.
या रिक्षा, टॅक्सी चालकांना मराठी शिकण्यासाठी एक वर्षाची मुदतवाढ देण्याचा निर्णय जाहीर करतानाच या वर्षभरात कुठलीही कारवाई केली जाणार नाही, असे आश्वासन फडणवीस यांनी दिले आहे. मराठी शिकण्यासाठी आम्हाला वेळ वाढवून द्या, अशी मागणी करत रिक्षा आणि टॅक्सी चालक संघटनांचे प्रतिनिधी फडणवीस यांना भेटले होते. या भेटीनंतर फडणवीस यांनी निर्णय जाहीर केला.
