मुंबई | Maharashtra Election 2024 : आगामी विधानसभा निवडणुकीसाठी भाजपने महायुतीच्या जागा वाटपाचे सूत्र ( फॉर्म्युला) तयार केला असल्याचे विश्वसनीय वृत्त आहे. भाजप 150 पेक्षा अधिक जागा लढविणार असून अजित पवार गटाला 60 आणि एकनाथ शिंदे गटाला 70 जागा देण्यात येणार आहे.
नवी दिल्लीत केंद्रीय मंत्री अमित शहा यांच्याशी झालेल्या चर्चेतून हा फॉर्म्युला निश्चित करण्यात आला आहे. या जागा वाटपात झाल्याच तर चार- पाच जागा मागेपुढे होतील, असेही सूत्रांनी सांगितले.भाजप, शिंदे गट आणि अजित पवार गट यांच्याकडील विद्यमान आमदारांच्या जागा त्या त्या गटाला सोडल्या जातील. मात्र काही जागा याला अपवादही ठरतील, असेही वृत्त आहे.
अजित पवार हे राष्ट्रवादी काँग्रेसमधून बाहेर पडले तेव्हा भाजपच्या नेत्यांनी त्यांना विधानसभेच्या 90 जागा देण्याचा शब्द दिला होता. परंतु त्यांना जास्त जागा देवून जोखीम उठविण्यासाठी भाजपचे नेतृत्व तयार नाही. अजित पवार गटाच्या वाट्याला 60 च्या आसपास जागा येतील. यात विद्यमान आमदार आणि काही अपक्ष आमदारही आहेत.
मुख्यमंत्री शिंदे यांनी 100 जागांची मागणी केली होती, पण त्यांच्या वाट्याला 70 च्या आसपास जागा येतील. शिंदे यांनी लोकसभा निवडणुकीतल्या जिंकलेल्या जागांचे गणित भाजपच्या नेतृत्वापुढे मांडले. तसेच शिंदे यांच्याकडे उमेदवारही नाहीत. त्यामुळे 70 जागांची लक्ष्मणरेखा भाजपने त्यांच्यासाठी आखली आहे.
