मुंबई : महापालिका आणि नगरपालिकांप्रमाणेच जिल्हा परिषदा आणि पंचायत समित्यांमध्येही ‘स्वीकृत सदस्य’ नियुक्त करण्याचा प्रस्ताव महसूलमंत्री चंद्रशेखर बावनकुळे यांनी मुख्यमंत्री देवेंद्र फडणवीस यांना दिला असून मुख्यमंत्र्यांनी त्यावर सकारात्मकता दर्शविली असल्याचे बावनकुळे यांनी सांगितले.
बावनकुळे म्हणाले, ग्रामीण भागात अनेक लोकप्रतिनिधी आणि तज्ज्ञ व्यक्ती विविध सामाजिक क्षेत्रांत उत्तम काम करतात. मात्र, जिल्हा परिषद निवडणुकीत महिला आरक्षण किंवा एससी, एसटी आरक्षणामुळे अनेक अनुभवी आणि अभ्यासू व्यक्तींना निवडणूक लढवता येत नाही. या तज्ज्ञ लोकांच्या अनुभवाचा फायदा ग्रामीण विकासासाठी व्हावा, या हेतूने त्यांना ‘स्वीकृत सदस्य’ म्हणून संधी द्यावी, अशी आग्रही मागणी आहे.
उपमुख्यमंत्री एकनाथ शिंदे, अजित पवार आणि ग्रामविकासमंत्र्यांशीही याबाबत चर्चा झाली. हा प्रस्ताव लवकरच मंत्रिमंडळाच्या बैठकीत आणि त्यानंतर विधिमंडळात मंजुरीसाठी येईल. जि.प. निवडणुकांत शक्य आहे, तेथे युती करण्याचा भाजपचा प्रयत्न आहे. काही ठिकाणी स्थानिक परिस्थितीनुसार निर्णय घेतले जातील, असेही बावनकुळे म्हणाले.
