नवी मुंबई : मुंबई एपीएमसीत गेल्या गुरुवारी गुढीपाडव्याला कोकण हापूसच्या केवळ 10 हजार पेट्यांची आवक झाली होती. त्यानंतर कोकण हापूससह परराज्यातील हापूसच्या आवकमध्ये वाढ झाली असून गेल्या तीन दिवसांत तब्बल 80 हजार 22 पेट्यांची एपीएमसीत आवक झाली आहे. यामध्ये कोकण हापूसच्या 44 हजार 58 पेट्यांचा समावेश आहे.
गेल्या वर्षीच्या तुलनेत अजूनही मार्च महिन्यात अपेक्षित अशी आवक सुरू झालेली नाही. गुढीपाडव्याला यावर्षी 40 हजार पेट्यांनी आवक घटली झाली होती. त्यामुळे हापूसचे दरही 5 ते 9 डझनाच्या पेटीचे 2 ते 8 हजार रुपये असल्याची माहिती घाऊक व्यापारी संजय पानसरे यांनी पुढारीशी बोलताना दिली.
गेल्या 20 दिवसांत कोकण हापूसच्या केवळ 70 हजार 331 पेट्यांची, तर परराज्यातील हापूसचे 1 लाख 43 हजार 676 क्रेटची आवक झाली. कोकण हापूसवर यंदा परराज्यातील हापूसने मात केली आहे. तर गेल्या तीन दिवसांत म्हणजे 23 ते 25 मार्चपर्यंत एकूण 80 हजार 22 पेट्यांची एपीएमसीतील घाऊक फळमार्केटमध्ये आवक झाली.
त्यामध्ये कोकण हापूसच्या 44 हजार 58 पेट्या, तर परराज्यातील 35 हजार 964 क्रेटची आवक झाली आहे. यामध्ये सर्वाधिक आवक ही बुधवारी 25 मार्च रोजी 31 हजार 403 पेट्यांची झाली. यात 16,833 पेट्या कोकण हापूस, तर 14,570 क्रेट परराज्यातील हापूसची आवक झाली आहे.
एप्रिलमध्ये आवक वाढल्यास कोकण हापूसचे पाच ते आठ डझन पेटीचे दर कमी होऊन 2000 ते 3500 रुपयांपर्यंत येऊ शकतात. मार्चअखेर देवगड, राजापूर हापूसची आवक आणखी वाढणार आहे.
आवक (23 ते 25 मार्च)
23 मार्च
कोकण हापूस - 13,930
परराज्य - 12,617
एकूण - 26,547
24 मार्च
कोकण हापूस - 13,295
परराज्य - 8,777
एकूण - 22,072
25 मार्च
कोकण हापूस - 16,833
परराज्य - 14,570
एकूण - 31,403
तीन दिवसांत एकूण 80,022 पेट्यांची आवक
कोकण हापूस 44,058
परराज्य हापूस 35,964
