Maratha Reservation : जरांगे-पाटलांच्या उपोषणाला माथाडी कामगारांचा पाठिंबा

नवी मुंबई: पुढारी वृतसेवा – कै. आमदार अण्णासाहेब पाटील यांनी मराठा समाजाला आर्थिक निकषावर आरक्षण मिळण्यासाठी ८० व्या शतकामध्ये चळवळ उभी केली. मराठा समाजाला आरक्षण मिळण्यासाठी त्यांनी आपल्या प्राणाचे बलिदान दिले. ही चळवळ आता पुन्हा सक्षमपणे उभी राहत असून, या चळवळीला व मनोज जरांगे-पाटील यांच्या उपोषणला माथाडी कामगारांचा भक्कम पाठींबा आहे. (Maratha Reservation) राज्य सरकारने आता मराठा समाजाला आरक्षण देण्याचा निर्णय लवकरात लवकर घ्यावा, असे प्रतिपादन महाराष्ट्र राज्य माथाडी, ट्रान्सपोर्ट आणि जनरल कामगार युनियनचे नेते माजी आमदार नरेंद्र अण्णासाहेब पाटील व आमदार शशिकांत शिंदे यांनी केले. (Maratha Reservation)

मराठा समाजाला आरक्षण मिळण्याच्या मागणीसाठी विशेषतः मनोज जरांगे-पाटील यांच्या व महाराष्ट्रभर सुरु असलेल्या उपोषणाला तमाम माथाडी कामगारांनी मुंबई कृषि उत्पन्न बाजार समितीच्या आवारातील दिवसभर कामे बंद ठेऊन पाठींबा व्यक्त करण्यासाठी नव्या मुंबईतील माथाडी भवन येथे सभा आयोजित केली होती.

या सभेला आमदार नरेंद्र अण्णासाहेब पाटील व शशिकांत शिंदे बोलत होते. यावेळी महाराष्ट्र राज्य माथाडी, ट्रान्सपोर्ट आणि जनरल कामगार युनियनचे कार्याध्यक्ष गुलाबराव जगताप, कार्यकर्ते सर्वश्री अजय इंगुळकर, जितेंद्र येवले, दिनकर सनुगले, बबन संकपाळ, नाना धोंडे, संभाजी बर्गे, सुरज बर्गे आदींची भाषणे झाली. सूत्रसंचालन जनसंपर्क अधिकारी पोपटराव देशमुख यांनी केले.

मुंबई कृषि उत्पन्न बाजार समितीच्या नव्या मुंबईतील पाचही मार्केट आवारातील कामे बंद ठेऊन कामगार, पालावाला महिला, मेहता कर्मचारी, वारणार, मापाडी कामगार सभेला उपस्थित होते. या सभेला युनियनचे संयुक्त सरचिटणीस चंद्रकांत पाटील, रविकांत पाटील, अॅड. भारतीताई पाटील, राजश्री पाटील आदी मान्यवर उपस्थित होते.