मुंबई, पुढारी वृत्तसेवा : शरद पवार यांचा राष्ट्रवादी काँग्रेसच्या राष्ट्रीय अध्यक्षपदी कायम राहण्याचा निर्णय हा कार्यकर्त्यांचा उत्साह आणि महाविकास आघाडीची ताकद वाढविणारा आहे, अशी भावना विधानसभा विरोधी पक्षनेते अजित पवार यांनी व्यक्त केली आहे. राष्ट्रवादी काँग्रेस पक्ष हे एक कुटुंब असून शरद पवार यांच्या नेतृत्वाखाली पक्ष राज्यात आणि देशात उज्वल यश संपादन करेल. पवार यांनी राष्ट्रीय अध्यक्षपदी कायम राहण्याचा निर्णय आपल्या सर्वांच्या आग्रहाखातर घेतला असून त्यांचे वय आणि प्रकृतीची काळजी घेऊन आपण सर्वांनी येणाऱ्या काळात अधिक जबाबदारी उचलावी.
कार्यकर्त्यांनी एकजुटीने आणि अधिक जोमाने काम करावे, असे आवाहनही अजित पवार यांनी केले. आम्ही सर्वजण आता पुन्हा नव्या जोमाने पक्षाच्या कामाला लागलो आहोत. शनिवारी ६ मे रोजी दौंड आणि कर्जत ७ बारामती, ८ कोरेगाव आणि सातारा, ९ फलटण, १० उस्मानाबाद, लातूर, ११ नाशिक आणि १२ मे रोजी पुणे असा दौरा कार्यक्रम असणार आहे, अशी माहितीही अजित पवार यांनी दिली आहे.
