सातार्‍याच्या सुरेखा यादव यांनी केले सोलापूर-मुंबई वंदे भारतचे सारथ्य | पुढारी

सातार्‍याच्या सुरेखा यादव यांनी केले सोलापूर-मुंबई वंदे भारतचे सारथ्य

मुंबई; पुढारी वृत्तसेवा :  आशियातील पहिल्या महिला लोको पायलट असलेल्या सुरेखा यादव यांनी सोमवारी (दि. 13) सोलापूर ते सीएसएमटी वंदे भारत एक्स्प्रेसचे सारथ्य केले. मेक इन इंडियाअंतर्गत तयार केलेली वंदे भारत एक्स्प्रेस चालवून मध्य रेल्वेचे नाव एका वेगळ्या उंचीवर नेऊन ठेवले.

महिला सक्षमीकरण आणि त्यांना सामान संधी देण्यात मध्य रेल्वे नेहमीच आघाडीवर आहे. महिलांच्या विकासासाठी विविध योजना नेहमी राबविण्यात येतात. मध्य रेल्वेवर सुरेखा यादव या पहिल्या महिला लोको पायलट आहेत. सोमवारी सोलापूर ते सीएसएमटी वंदे भारत एक्स्प्रेस सुरेखा यादव यांनी चालविली. एक्स्प्रेस छत्रपती शिवाजी महाराज टर्मिनस येथील प्लॅटफॉर्म क्रमांक 8 वर आल्यानंतर सुरेखा यांचा सत्कार करण्यात आला. सुरेखा यादव म्हणाल्या, अत्याधुनिक वंदे भारत एक्स्प्रेस चालविण्याची संधी मध्य रेल्वेने दिल्याबद्दल मी कृतज्ञ आहे. गाडी वेळेच्या 5 मिनिटे आधीच सीएसएमटीला पोहोचली. ट्रेन चालविणे शिकण्याच्या प्रक्रियेमध्ये सिग्नल पाहणे, नवीन उपकरणे वापरणे, इतर क्रू मेंबर्ससोबत समन्वय, ट्रेन चालवण्यासाठी सर्व पॅरामीटर्स पाळणे यांचा समावेश होतो.

महाराष्ट्रातील सातारा येथील सुरेखा यादव या 1988 मध्ये भारतातील पहिल्या महिला रेल्वेचालक बनल्या. त्यांच्या या क्षेत्रातील कामगिरीसाठी त्यांना राज्य आणि राष्ट्रीयस्तरावर अनेक पुरस्कारांनी सन्मानित करण्यात आले आहे.

Back to top button