छत्रपती संभाजीनगर : राज्यातील सर्वोत्कृष्ट पोलिस ठाण्यांची नावे गृह मंत्रालयाने नुकतीच जाहीर केली. यात छत्रपती संभाजीनगर येथील वाळूज ठाण्याचा समावेश असून सलग दुसर्यांदा या ठाण्याला हा बहुमान मिळाला आहे. वरिष्ठ पोलिस निरीक्षक संदीप गुरमे यांनी सलग दुसर्या वर्षी प्रमाणपत्र आणि सन्मानचिन्ह स्वीकारले. याबद्दल पोलिस आयुक्त मनोज लोहिया यांनी त्यांचे अभिनंदन केले.
वरिष्ठ पोलिस अधिकार्यांच्या कॉन्फरन्समध्ये 2016 मध्ये देशपातळीवरील दहा सर्वोत्कृष्ट पोलिस ठाण्यांची निवड करण्यासंदर्भात केंद्रीय स्तरावर निर्णय घेण्यात आला होता. पोलिस ठाण्यांची कार्यक्षमता वाढविणे, कामगिरी सुधारणे, उत्कृष्ट पद्धतीने काम करणे, गुन्हेगारीला प्रतिबंध करणे, गुन्ह्यांचा तपास करणे, कायदा व सुव्यवस्था राखणे, त्यासाठी पोलिस अधिकारी, अंमलदार यांना प्रोत्साहित करणे आदीसाठी राज्य पातळीवर पाच सर्वोत्कृष्ट पोलिस ठाण्यांची निवड करण्यात येते. त्यांना सन्मानचिन्ह व रोख बक्षीस प्रदान केले जाते. 2021 या वर्षातील कार्य मूल्यांकन करून पाच सर्वोत्कृष्ट पोलिस ठाण्यांची निवड करण्यात आली आहे. अपर पोलिस महासंचालक (कायदा व सुव्यवस्था) संजय सक्सेना यांनी सर्वोत्कृष्ट पोलिस ठाण्यांची यादी जाहीर केली.
