SIT finally formed in Somnath Suryavanshi murder case
परभणी, पुढारी वृत्तसेवा : सोमनाथ सूर्यवंशी मृत्यूप्रकरणी एसआयटी स्थापन करण्यात आली असून, त्या पथकात परभणीतील एकाही पोलिस अधिकारी-कर्मचाऱ्याचा समावेश नाही. पोलिस महासंचालक रश्मी शुक्ला यांनी याबाबतचे आदेश जारी केले.
परभणी शहरात दि.१० डिसेंबर २०२४ रोजी सायंकाळी जिल्हाधिकारी कार्यालयासमोर असलेल्या डॉ. बाबासाहेब आंबेडकर यांच्या पूर्णाकृती पुतळ्याजवळ ठेवण्यात आलेल्या संविधानाच्या प्रतिकृतीची विटंबना झाली होती. तदनंतर दि.११ डिसेंबर रोजी शहर बंदचे आवाहन करण्यात आले होते. शहरात बंददरम्यान उसळलेल्या हिसाचारानंतर पोलिस कोठडीत झालेल्या मारहाणीमध्ये सोमनाथ सूर्यवंशी यांचा मृत्यू झाला होता. याप्रकरणी मुंबई उच्च न्यायालयाच्या औरंगाबाद खंडपीठाने दोषी पोलिस अधिकाऱ्यांविरुध्द गुन्हे नोंदविण्याचे आदेश दिले होते.
सर्वोच्च न्यायालयाने औरंगाबाद खंडपीठाचा निर्णय अंतिम ठेवत दोषींवर गुन्हे दाखल करण्याचे आदेश दिले होते. यानंतर अज्ञात पोलिस अधिकार्याविरुध्द नवा मोंढा पोलिस ठाण्यात गुन्हा नोंदविण्यात येऊन प्रकरणाचा तपास राज्य गुन्हे अन्वेशन विभागाकडे सोपविण्यात आला होता.
सीआयडीचे विशेष पोलिस महानिरीक्षक सुधीर हिरेमठ हे या पथकाचे प्रमुख आहेत. पथकात नागपूर सीआयडीचे पोलिस अधीक्षक अभिजीत धाराशिवकर, नांदेड सीआयडीचे पोलिस उपअधीक्षक अनिल गव्हाणकर यांचा समावेश आहे. विशेष बाब म्हणजे तपासणी पथकामध्ये जिल्ह्यातील एकही अधिकारी अथवा कर्मचारी राहणार नाही, असे निर्देश राज्य पातळीवरून देण्यात आल्याचे समजते.
