Retired Treasury Officer Swindled of ₹14 Lakhs in 'Digital Arrest' Scam
नांदेड, पुढारी वृत्तसेवा : दहशतवाद्यांशी संबंध असून, मुंबईत गुन्हा दाखल झाल्याची भीती दाखवत शहरातील पवननगर भागातील एका निवृत्त कोषागार अधिकाऱ्याला सायबर भामट्यांनी दोन दिवस 'डिजिटल अरेस्ट' करून १४ लाख १५ हजार रुपयांना लुटले. याप्रकरणी सायबर पोलिस ठाण्यात ५ जणांवर गुन्हा दाखल करण्यात आला आहे.
शिवाजी संभाजीराव तुंबलवाड (वय ६७) असे फसवणूक झालेल्या अधिकाऱ्याचे नाव आहे. त्यांना 'प्रिया मॅडम' नावाच्या महिलेचा आणि नंतर अमित चौधरी, संदीपराव, प्रदीप जयस्वाल यांचा फोन आला. त्यांनी पोलिस अधिकारी असल्याचे भासवून, "तुमच्या सिमकार्डचा वापर देशविरोधी कारवायांसाठी झाला आहे," अशी भीती घातली. कारवाईतून वाचण्यासाठी भामट्यांनी तुंबलवाड यांना सोने गहाण ठेवून 'गोल्ड लोन' काढायला लावले आणि १४ लाख १५ हजार रुपये स्वतःच्या खात्यात वळते करून घेतले.
त्यानंतर दोन दिवस त्यांना कुणाशीही संपर्क न करण्याचा दम देत घरातच 'डिजिटल अरेस्ट' करून ठेवले. फसवणूक झाल्याचे लक्षात आल्यावर त्यांनी सायबर पोलिस ठाण्यात धाव घेतली. पोलिस निरीक्षक वसंत सप्रे या प्रकरणाचा पुढील तपास करीत आहेत.
घाबरू नका; १९३० वर संपर्क साधा !
सध्या 'डिजिटल अरेस्ट'च्या माध्यमातून फसवणूक वाढली आहे. पोलिस कधीही व्हिडिओ कॉलवर अटक करत नाहीत किंवा पैसे मागत नाहीत. असा फोन आल्यास न घाबरता तात्काळ स्थानिक पोलिस किंवा १९३० या सायबर हेल्पलाइनवर संपर्क साधावा.
