नांदेड ः नांदेड जिल्ह्यात वाळू तस्करांनी अक्षरशः उच्छाद मांडला असून, पोलिसांनी वाळूमाफियांवर कितीही कारवाईचा बडगा उगारला तरी वाळू तस्करी सुरूच आहे. लिंबगाव पोलिस ठाण्याच्या हद्दीत वाघी तांडा येथे वाळूचे अवैध वाहतूक करणारे दोन टिप्पर पोलिसांनी जप्त करत, दोन जणांविरोधात गुन्हा दाखल केला आहे.
लिंबगाव येथील पोलिस ठाण्याचे सहा.पोलिस निरीक्षक पी.सी. बोधनकर, पोलिस कॉन्स्टेबल काझी, टाक, हरविंदरसिंघ यांचे पथक गस्तीवर असताना वाघी रस्त्यावर जिल्हा परिषद शाळेसमोर एम एच 04 एफ यू 9829 क्रमांकाचा वाळूची तस्करी करणारा टिप्पर आढळून आला.
पोलिसांनी वाळूच्या साठ्यासह टिप्पर असा दहा लाखांचा मुद्देमाल जप्त केला. या प्रकरणी मुदस्सर नजर अब्दुल लतीफ याने दिलेल्या फिर्यादीवरून स्वप्नील सखाराम तारु व विष्णू र्त्यंबक भालेगाव या दोघांविरोधात लिंबगाव पोलिस ठाण्यात गुन्हा दाखल करण्यात आला आहे.
