उमरीः उमरी येथून सावरगाव (कला) गावाकडे आपल्या दुचाकीवरून जाताना रस्त्यावरच उभ्या असलेल्या एका ट्रॅक्टरवर दुचाकी आदळली त्यात दोघे जण जागीच ठार झाल्याची घटना रामखडकफाटा ते सावरगाव फाटा रस्त्यावर सोमवारी रात्री आठ वाजण्याच्या सुमारास घडली आहे.
उमरी तालुक्यातील सावरगाव (कला) येथील माधव संभाजी जोगदंड वय 45 वर्ष आणि आनंदा दिगंबर खांडरे वय 37 वर्ष हे दोघे आपल्या दुचाकी वरून गावाकडे जात असताना रस्त्यावरच उभ्या असलेल्या एका ट्रॅक्टरवर त्यांची दुचाकी आदळून झालेल्या अपघातात दोघे जण जागीच ठार झाले.
त्यामुळे सावरगाव (कला) गावावर शोककळा पसरली असून मंगळवारी सकाळी उमरीच्या ग्रामीण रुग्णालयात वैद्यकीय अधिकारी डॉ. चंदापुरे यांनी दोघांवरही शवविच्छेदन करून त्यांचे मृतदेह नातेवाईकांच्या ताब्यात दिले आहेत. अशी माहिती सावरगाव (कला) येथील माजी सरपंच सुभाष जोगदंड यांनी दैनिक पुढारीशी बोलताना दिली आहे. या प्रकरणी ट्रॅक्टर चालकाविरुद्ध उमरी पोलीस ठाण्यात गुन्हा दाखल करण्यात आला आहे. सदरील ट्रॅक्टर हा एका गुत्तेदाराचा असून नादुरूस्त झाल्यामुळे रस्त्यावरच उभा होता.
