Illegal Cattle Transport Nanded
नायगाव बाजार : नायगाव तालुक्यात गोवंशाची बेकायदेशीर व अमानुष वाहतूक करणाऱ्यांविरोधात रामतीर्थ पोलिसांनी कठोर कारवाई करत मोठा प्रकार उघडकीस आणला आहे. सहा बैलांना निर्दयीपणे कोंबून वाहतूक करणाऱ्या एका आरोपीस अटक करण्यात आली. या कारवाईत एकूण ११ लाख ८० हजार रुपयांचा मुद्देमाल जप्त करण्यात आला आहे.
रामतीर्थ पोलीस ठाण्याचे सहाय्यक पोलीस निरीक्षक विक्रम हराळे यांच्या मार्गदर्शनाखाली ही कारवाई पार पडली. हेड कॉन्स्टेबल गौसखां पठाण यांच्या फिर्यादीवरून ७ एप्रिलरोजी सकाळी सुमारे ८.१० वाजता लोहगाव येथील सरकारी दवाखान्यासमोरील रस्त्यावर सापळा रचण्यात आला. यावेळी संशयित पिकअप (क्र. MH-26-CH-9747) अडवून तपासणी केली असता, सहा बैलांना लाकडी फळ्यांमध्ये कोंबून अत्यंत अमानुष स्थितीत वाहतूक केली जात असल्याचे आढळले.
या प्रकरणी विजय रामराव काळेकर (वय ३५, रा. चिटमोगरा, ता. बिलोली) याला तात्काळ अटक करण्यात आली. जप्त करण्यात आलेल्या बैलांची किंमत अंदाजे २ लाख ८० हजार रुपये असून वाहनाची किंमत सुमारे ९ लाख रुपये असल्याचे पोलिसांनी सांगितले.
या प्रकरणात प्राण्यांच्या छळ प्रतिबंधक अधिनियम १९६० अंतर्गत विविध कलमांन्वये गुन्हा दाखल करण्यात आला. पुढील तपास पोलीस हेड कॉन्स्टेबल काळे यांच्याकडे सोपविण्यात आला आहे.
दरम्यान, विक्रम हराळे यांच्या नेतृत्वाखालील पथकाने दाखविलेल्या तत्परतेमुळे ही कारवाई यशस्वी ठरल्याची चर्चा असून, पोलीस उपनिरीक्षक शिवराज नरवाडे व सहाय्यक पोलीस उपनिरीक्षक भवानगीकर यांच्यासह संपूर्ण पथकाचे नागरिकांकडून कौतुक होत आहे.
