नांदेड : जिल्ह्यात अवैध गौण खनिज उत्खनन व वाहतुकीविरुद्ध पोलिस अधीक्षक डॉ. नीलाभ रोहन यांच्या आदेशानुसार विशेष मोहीम राबवली जात आहे. या मोहिमेंतर्गत माळाकोळी पोलिस ठाण्याच्या हद्दीत विनापरवाना रेतीची वाहतूक करणाऱ्या एका हायवा वाहनावर धडक कारवाई करण्यात आली. या कारवाईत पोलिसांनी एकूण ३० लाख २० हजार रुपये किमतीचा मुद्देमाल जप्त केला आहे.
२९ ऑगस्टच्या रात्री माळाकोळी हायवेवर हायवामधून अवैधरीत्या रेती वाहतूक होत असल्याची गुप्त माहिती पोलिसांना मिळाली होती. या माहितीवरून पोलिस पथकाने तत्काळ नाकाबंदी करून वाहन थांबवले. तपासणीदरम्यान वाहनात आवश्यक परवानगीशिवाय भरलेली सुमारे ४ ब्रास रेती आढळून आली.
पोलिसांनी पंचनामा करत ३० लाख रुपयांचा हायवा आणि २० हजार रुपयांची रेती असा एकूण ३० लाख २० हजार रुपयांचा मुद्देमाल जप्त केला. याप्रकरणी दोन आरोपींविरुद्ध माळाकोळी पोलिसांत गुन्हा दाखल करण्यात आला आहे. ही कारवाई अपर पोलिस अधीक्षक सूरज गुरव यांच्या मार्गदर्शनाखाली सपोनि राजकुमार हिंगोले, पोउपनि बालाजी रेड्डी आणि पथकाने पार पाडली.
