Nilanga Sugarcane Farm Fire
निलंगा : दुष्काळी परिस्थितीत पाण्याची कमतरता असतानाही मोठ्या कष्टाने जोपासलेला तीन एकर ऊस आगीच्या भक्ष्यस्थानी पडल्याची घटना काटेजवळ शिवारात घडली. प्रशांत लांबोटे यांच्या सर्व्हे क्रमांक ७० मधील ऊस जळून पूर्णपणे खाक झाला असून, या घटनेत त्यांचे लाखो रुपयांचे नुकसान झाल्याचे सांगण्यात येत आहे.
यंदा दुष्काळी परिस्थितीमुळे शेती करणे शेतकऱ्यांसाठी मोठे आव्हान ठरले आहे. उपलब्ध पाण्याचा काटकसरीने वापर करत लांबोटे यांनी मोठ्या मेहनतीने तीन एकर ऊस जोपासला होता. पीक काढणीच्या टप्प्यात आले असतानाच अचानक आग लागल्याने संपूर्ण ऊस जळून गेला. त्यामुळे वर्षभराची मेहनत आणि खर्च वाया गेल्याने शेतकऱ्यावर आर्थिक संकट ओढवले आहे.
आग नेमकी कशामुळे लागली, याचे कारण अद्याप स्पष्ट झालेले नाही. मात्र, अज्ञात व्यक्तीने ऊस पेटवून दिल्याचा संशय व्यक्त केला जात आहे. या घटनेमुळे परिसरातील शेतकऱ्यांमध्ये संतापाचे वातावरण आहे. दोषी व्यक्तीचा शोध घेऊन त्याच्यावर कठोर कारवाई करावी, अशी मागणी होत आहे.
घटनेची माहिती मिळताच काटेजवळगा गावचे सरपंच शरद सोमवंशी यांनी घटनास्थळी भेट देऊन पाहणी केली. त्यांनी शेतकरी प्रशांत लांबोटे यांना धीर दिला.
दरम्यान, महसूल विभागासह संबंधित प्रशासनाने तातडीने घटनास्थळी पाहणी करून नुकसानीचा पंचनामा करावा. तसेच नुकसानग्रस्त शेतकऱ्याला शासनाकडून आर्थिक मदत मिळवून द्यावी, अशी मागणी शेतकरी वर्गातून करण्यात आली आहे. तसेच ऊस जाळण्यामागील नेमके कारण शोधून संबंधितांवर कायदेशीर कारवाई करण्याची मागणीही जोर धरत आहे.
