Chakur Panchayat Samiti Women Agitation
चाकूर : स्वाभिमानी मजूर संघटनेच्या वतीने मनरेगा अंतर्गत काम देण्याच्या मागणीसाठी पंचायत समिती कार्यालयासमोर शुक्रवारी (दि. ६) महिलांच्या वतीने निदर्शने करण्यात आली. दरम्यान गटविकास अधिकारी यांना निवेदन देवून आंदोलन करण्याचा इशारा देण्यात आला
त्यांनी दिलेल्या निवेदनात तालुक्यातील अनेक गावांतील मजुरांनी नमुना क्र. ४ भरून कामाची मागणी केली असूनही त्यांना अद्याप काम देण्यात आलेले नाही. कामाची मागणी करून १५ दिवसांपेक्षा जास्त कालावधी उलटूनही काम न दिल्यास संबंधित मजुरांना बेरोजगार भत्ता देण्याची तरतूद आहे, मात्र त्याकडे दुर्लक्ष होत असल्याचा आरोप करण्यात आला आहे.
यासोबतच ग्रामपंचायतीमध्ये ग्रामसेवक किंवा रोजगार सेवकांनी नमुना क्र. ४ दाखल करून घ्यावा, काम मागणी करणाऱ्या मजुरांना तातडीने काम द्यावे, तसेच मनरेगा मजुरी दर वाढवून ८०० रुपये प्रतिदिन करावा, अशा मागण्या निवेदनातून करण्यात आल्या आहेत.
दरम्यान, मागण्यांकडे लक्ष न दिल्यास पंचायत समिती कार्यालयासमोर आंदोलन करण्याचा इशारा स्वाभिमानी मजूर संघटनेने निवेदनाद्वारे दिला आहे. या निवेदनावर वर्षारानी वाघमारे,अंजली येदले,दैवशाला काकनाटे,आम्रपाली तिगोटे,पंचशीला बनसोडे आदीच्या स्वाक्षरी आहेत.
