लातूर ः स्थानिक गुन्हे शाखेने शिरूर अनंतपाळ तालुक्यातील येरोळ मोड येथे आयपीएल क्रिकेट सट्टा चालविणाऱ्या एका आरोपीला अटक केली. या कारवाईत 7 लाख 6 हजार 710 रुपयांचा मुद्देमाल जप्त करण्यात आला.
15 मे रोजी रात्री पोलिसांना येरोळ मोड येथील एका हॉटेलजवळ मारुती स्वीफ्ट कारमध्ये बसून आयपीएल सामन्यावर ऑनलाईन सट्टा सुरू असल्याची माहिती मिळाली होती. त्यानुसार पोलिसांनी सापळा रचून एम एच-55-बी-0534 क्रमांकाच्या कारची तपासणी केली.
यावेळी तातेराव शिवाजी दंडीमे (वय 34, रा. उदगीर) याला ताब्यात घेण्यात आले. त्याच्याकडून दोन मोबाईल, एक लॅपटॉप, रोख रक्कम, सट्ट्याच्या हिशोबाच्या डायऱ्या, कॅल्क्युलेटर व कार असा मुद्देमाल जप्त करण्यात आला.
आरोपी मोबाईल व लॅपटॉपच्या माध्यमातून आयपीएल क्रिकेट सामन्यांवर ऑनलाईन बेटिंग स्वीकारत असल्याचे तपासात निष्पन्न झाले. याप्रकरणी महाराष्ट्र जुगार प्रतिबंधक कायद्यानुसार गुन्हा दाखल करण्यात आला असून पुढील तपास शिरूर अनंतपाळ पोलीस करत आहेत.
