देवणी: पुढारी वृत्तसेवा : तालुक्यातील धनेगाव येथील शिवारात रानडुकराने केलेल्या हल्ल्यात तरुण शेतकरी गंभीर जखमी झाला. त्याला उपचारासाठी उदगीर येथील खासगी रुग्णालयात दाखल करण्यात आले आहे.
याबाबत अधिक माहिती अशी की, धनेगाव येथील शिवारात सोमवारी शेतकरी राजकुमार वसंतराव बिरादार शेतात गेले होते. नदीकाठच्या शेतात रानडुक्कराने त्यांच्यावर हल्ला चढविला. यात ते गंभीर जखमी झाले. त्यांना उपचारासाठी उदगीर येथील खासगी रुग्णालयात दाखल केल्याची माहिती त्यांच्या कुटुंबियांनी दिली.
सद्यस्थितीला उसाचे गाळप झाले आहे. तर इतर पिकांची काढणी झाल्याने राने मोकळी झाली आहेत.त्यामुळे वन्यप्राणी यांना लपण्यासाठी जागा नसल्याने हे हिंस्त्र प्राणी आता शेतकऱ्यांवर हल्ला करत आहेत. या प्राण्यांचा बंदोबस्त करावा व शेतकऱ्यांना उपचारासाठी निधीची तरतूद करावी, अशी मागणी शेतकरी वर्गातून होत आहे.
लातुर येथील जिल्हा वनविभाग अधिकारी यांना निवेदन देऊन सदर शेतकऱ्यांना मदत मिळावी. वन्यप्राण्यांचा बंदोबस्त करावा, अशी मागणी केल्याची माहिती उपसरपंच रामलिंग शेरे यांनी दिली.
