लातूर, पुढारी वृत्तसेवा : लातूर महापालिकेचे आयुक्त बाबासाहेब मनोहरे यांनी शनिवारी (दि.०५) मध्यरात्री स्वतःच्या डोक्यात गोळी झाडून जीवन संपवण्याचा प्रयत्न केला. सध्या त्यांच्यावर येथील एका खासगी रुग्णालयात उपचार सुरू असून त्यांनी उचललेल्या या टोकाच्या पावलामागचे कारण अद्याप स्पष्ट झालेले नाही.
मनोहरे हे एमआयडीसी परिसरातील शासकीय अधिकाऱ्यांच्या वसाहतीतील बंगल्यात वास्तव्यास आहेत. त्यांनी शनिवारी रात्री नेहमीप्रमाणे जेवण केले व झोपण्यासाठी आपल्या खोलीत गेले. मध्यरात्री सुमारे साडेअकराच्या सुमारास त्यांच्या खोलीतून गोळीबाराचा मोठा आवाज आला. आवाज ऐकून सुरक्षा रक्षकांनी तत्काळ खोलीकडे धाव घेतली. त्यावेळी मनोहरे हे रक्ताच्या थारोळ्यात पडलेले आढळले. त्यांना तातडीने लातूरमधील सह्याद्री हॉस्पिटलमध्ये दाखल करण्यात आले. प्राथमिक तपासणीत गोळी डोक्याच्या उजव्या बाजूने आरपार गेली असल्याचे निष्पन्न झाले. त्यामुळे मेंदूच्या काही भागांना इजा झाली असून कवटीच्या हाडांचे तुकडे मेंदूत पसरले आहेत. त्यामुळे त्यांच्यावर अत्यंत जटिल अशी शस्त्रक्रिया केली जाणार आहे.
शस्त्रक्रियेपूर्वीची वैद्यकीय स्थिती सांगताना, उपचार करणारे डॉ. हनुमंत किनीकर यांनी सांगितले की, "सध्या आयुक्त मनोहरे यांची प्रकृती स्थिर असून ते उपचाराला चांगला प्रतिसाद देत आहेत. शस्त्रक्रियेनंतर पुढील स्थिती स्पष्ट होईल." दरम्यान, या घटनेची माहिती मिळताच लातूरचे पोलीस अधीक्षक सोमय मुंडे तसेच अन्य वरिष्ठ पोलीस अधिकारी घटनास्थळी पोहोचले असून अधिक तपास सुरू आहे. आयुक्तांनी टोकाचे पाऊल का उचलले, याबाबत प्रशासन आणि पोलिसांकडून तपास सुरू करण्यात आला आहे.
