The market boomed due to Gudi Padwa and Eid
जालना, पुढारी वृत्तसेवा : गुढीपाडवा व ईद हे दोन्ही सण यंदा गुरुवार, १९ मार्च रोजी एकाच दिवशी साजरे होत असल्याने जालना शहरातील बाजारपेठेत उत्साहाचे वातावरण पहायला मिळत आहे. या दुहेरी सणाच्या पार्श्वभूमीवर नागरिकांनी खरेदीसाठी मोठ्या प्रमाणात गर्दी केली आहे.
गुढी पाडव्यानिमित्त गुढी उभारण्यासाठी लागणारे वेळू (बांबू), भगवे ध्वज, साखरेच्या गाठी, फुलांचे हार तसेच पारंपरिक वस्तूंची विक्री मोठ्या प्रमाणावर होत आहे. महिलांनी नवीन साड्या, दागिने व घर सजावटीच्या वस्तूंची खरेदी करण्याबर भर दिला आहे. तर पुरुष वर्गाकडूनही कपडे व इतर साहित्य खरेदीसाठी उत्सुकता दिसून येत आहे.
दरम्यान, ईदच्या निमित्ताने बाज ारात शेवया, खजूर, ड्राय फ्रूट्स, मसाले आणि गोड पदार्थांच्या खरेदीसाठी मुस्लिम बांधवांची गर्दी उसळली आहे. मिठाई दुकाने व किराणा व्यापाऱ्यांकडे ग्राहकांची मोठी वर्दळ दिसून येत आहे.
याशिवाय, सणांच्या शुभमुहूर्तावर अनेकांनी दुचाकी व चारचाकी वाहनांची खरेदी करण्यास प्राधान्य दिल्याने वाहन विक्री केंद्रांवरही ग्राहकांची संख्या वाढली आहे. त्यामुळे बाजारपेठेत दिवसभर चैतन्याचे वातावरण निर्माण झाले आहे. एकाच दिवशी दोन मोठे सण आल्याने व्यापाऱ्यांमध्येही समाधान व्यक्त होत असून, यामुळे व्यापाराला चांगली चालना मिळत असल्याचे चित्र आहे. नागरिकांमध्ये उत्साह आणि आनंदाचे वातावरण असून जालना शहर सणमय झाले आहे.
चार चाकी व दुचाकी शोरुम सजले
जालना शहरात गुढीपाडवा सणानिमित्त दुचाकी व चारचाकी वाहनांची चांगली विक्री होण्याचा अंदाज आहे. हिंदू बांधवांचा गुढीपाडवा व मुस्लिम बांधवांचा ईद हा सण एकाच दिवशी आल्याने वाहन विक्री चांगली होणार आहे.
