Record high prices of ₹7,200 for soybean and ₹8,100 for tur
जालना, पुढारी वृत्तसेवा : जालना कृषी उत्पन्न बाजार समितीत बुधवारी (दि. २२) विविध शेतीमालाची एकूण २ हजार १३३ क्विंटल आवक झाली. दिवसभरात गहू, ज्वारी, बाजरी, मका, तूर, हरभरा, सोयाबीन आदी पिकांचे व्यवहार झाले. सोयाबीनला प्रतिक्विंटल ७ हजार २०० रुपये, तर पांढऱ्या तुरीला ८ हजार १०० रुपयांचा कमाल भाव मिळाल्याने शेतकऱ्यांना काहीसा दिलासा मिळाला.
बाजार समितीच्या दैनंदिन आवक अहवालानुसार ज्वारीची सर्वाधिक ४७५ क्विंटल आवक झाली. ज्वारीला प्रतिक्विंटल २ हजार २०० ते ४ हजार ९०१ रुपये, सरासरी ३ हजार ५५० रुपये भाव मिळाला. गव्हाची ५६८ क्विंटल आवक होऊन त्याला २ हजार ५७५ ते २ हजार ७०० रुपये, सरासरी २ हजार ५८० रुपये भाव मिळाला.
सोयाबीनची २७८ क्विंटल आवक झाली असून त्याला ५ हजार ६०० ते ७हजार २०० रुपये, सरासरी ७ हजार १५० रुपये दर मिळाला. पांढऱ्या तुरीची १४२ क्विंटल आवक झाली असून कमाल ८ हजार १०० रुपये, किमान ५ हजार ८०० रुपये आणि सरासरी ७ हजार ८०० रुपये भाव नोंदविण्यात आला.
हिख्या बाजरीची २६६ क्विंटल, लाल मक्याची २१३ क्विंटल, गावरान हरभऱ्याची १४७ क्विंटल आणि काळ्या हरभऱ्याची १० क्विंटल आवक झाली. गावरान हरभऱ्याला कमाल ६ हजार १०० रुपये, तर काळ्या हरभऱ्याला ६ हजार ७०० रुपयांचा भाव मिळाला. याशिवाय एरंडी, उडीद, सूर्यफूल आणि राईचेही व्यवहार बाजार समितीत पार पडले.
