जालना ः अंगारिका चतुर्थीच्या पार्श्वभूमीवर श्री गणपती संस्थान राजूर येथे भाविकांनी मोठ्या संख्येने उपस्थिती लावत भक्तीभावाने दर्शन घेतले. या दिवशी विविध स्वरूपातील देणग्यांमधून तब्बल 21 लाख 94 हजार 596 रुपये इतकी रक्कम जमा झाल्याची माहिती संस्थानतर्फे देण्यात आली.
मिळालेल्या माहितीनुसार, संस्थान देणगी, अभिषेक, बांधकाम तसेच सुबक मार्बल आसनासाठी भाविकांनी उदार हस्ते देणग्या दिल्या. यामधून एकूण 8 लाख 50 हजार 526 रुपये जमा झाले. तसेच दानपेटी व बांधकाम दानपेटीतून एकूण 13 लाख 44 हजार 70 रुपये प्राप्त झाले. या दोन्ही रकमा मिळून एकूण देणगीचा आकडा 21 लाख 94 हजार 596 रुपये इतका झाला आहे.
अंगारकी चतुर्थीच्या दिवशी मंदिर परिसरात पहाटेपासूनच भाविकांची मोठी गर्दी पाहायला मिळाली. भक्तांनी उत्साहात गणरायाचे दर्शन घेत नवस फेडले. अंगारिका चतुर्थी निमित्त मंदिरात दिवसभर भाविकांची गर्दी उसळली होती. संस्थान प्रशासनाने केलेल्या नियोजनामुळे दर्शन व्यवस्था सुरळीत पार पडल्याने भाविकांनी समाधान व्यक्त केले. संस्थानतर्फे भाविकांसाठी सुरळीत दर्शनाची व्यवस्था करण्यात आली होती.
देणगीचा तपशील
संस्थान देणगी : 7,34,800
अभिषेक देणगी : 53,429
बांधकाम देणगी : 13,700
मार्बल आसन देणगी : 48,597
उपएकूण : 8,50,526
दानपेटी : 9,06,770
बांधकाम दानपेटी : 4,37,300
उपएकूण : 13,44,070
एकूण देणगी : 21,94,596
