Preparations in full swing for the Shardeya Navratri festival in Mantha
बालाजी कुलकर्णी मंठा : तालुक्यासह पंचक्रोशीतील भाविकांचे श्रद्धास्थान तसेच मंठावाशी यांचे ग्रामदैवत असलेल्या सिद्धीपीठ श्री रेणुका मातेच्या शारदीय नवरात्र महोत्सवास २२ सप्टेंबर सोमवारपासून प्रारंभ होत आहे. नवरात्र उत्सवाच्या काळात घटस्थापनेपासून ते विजयादशमीपर्यंत मंदिरामध्ये विविध धार्मिक अनुष्ठान होत असतात. या पार्श्वभूमीवर नगरपंचायत, पोलिस प्रशासन व संस्थांकडून नवरात्र यात्रा उत्सवाची जय्यत तयारी सुरू आहे.
गणेशोत्सवाची धामधूम संपल्यानंतर भाविकांना वेध लागतात ते नवरात्र उत्सवाचे. अश्विन शुद्ध प्रतिपदेला नवरात्रौत्सवास प्रारंभहोणार असून नवरात्र उत्सव अवघ्या तीन ते चार दिवसांवर येऊन ठेपला असल्याने नगरपंचायत व पोलिस प्रशासन प्रशासनाच्यावतीने मंदिर परिसरामध्ये पाहणी करण्यात आली. व भाविकांच्या सोयी सुविधांबाबत आढावा घेण्यात आला. यावेळी मंठा पोलिस निरीक्षक मनोजकुमार राठोड, बाजार समिती संचालक वैजनाथ बोराडे, मुख्याधिकारी मनोज उकिरडे, सभापती बाज खा पठाण, नगरसेवक उबेद बागवान, धरणेकरी नागेश कुलकर्णी, सुधीर जोशी, सुनील कुलकर्णी, सुरेश अष्टीकर, संजय कुलकर्णी यांची प्रमुख उपस्थिती होती.
यावेळी वैजनाथ बोराडे यांनी देवी रोडवरील विद्युत खांबावरील लाईट, सीसीटीव्ही व मंदिर परिसरामध्ये भाविकांसाठी पाण्याची व्यवस्था स्वच्छतेविषयी उपस्थित कर्मचाऱ्यांना सूचना दिल्या. यासह पोलिस निरीक्षक राठोड यांनी वाहन पार्किंग व मंदिर रोडवरील वाहतूक व्यवस्था, भाविकांच्या दर्शन रांगेतील सुरक्षा व्यवस्था त्याचबरोबर यात्रा ठिकाणाची पाहणी करून सुरक्षेबाबत आढावा घेतला. मान्यवरांनी मार्गदर्शन केले.
यावेळी मंदिर संस्थानचे डॉ. राधाकिसन ठोके, योगेश ठोके, गजानन ठोके, अजय ठोके यांनी मंदिरातील धार्मिक उत्सवाविषयी सविस्तर माहिती प्रशासनास दिली. याप्रसंगी कार्यालयीन अधीक्षक मुजम्मिल अन्सारी, अभियंता चव्हाण, पोलिस हेड कॉन्स्टेबल आनंद ढवळे, भगवान कुलकर्णी संकेत देशमुख, संतोष तिवारी, दामोधर लेखपाल यांच्यासह आदींची उपस्थिती होती.
पोलिस निरीक्षक राठोड यांनी सांगितले की, नवरात्र उत्सवात होणारी गर्दी लक्षात घेऊन पोलिस प्रशासनाकडून मोठा बंदोबस्त करण्यात येणार आहे तसेच भाविकांसाठी पार्किंगची योग्य व्यवस्था केली जाणार असून वाहतूक कोंडी होणार नाही तसेच भाविकांच्या सुरक्षिततेची ही दक्षता घेतली जाईल.
