Mozambi 17 thousand rupees per ton
जालना, पुढारी वृत्तसेवाः जालना मोंढ्यात पावसामुळे मोसंबीचा दर्जा घसरल्याने मोसंबीचे भाव पडले आहेत. यामुळे मोसंबी उत्पादक शेतकरी अडचणीत सापडल्याचे चित्र आहे. सध्या मोसंबी १२ हजार ते १४ हजार रुपये टन या भावाने विक्री होत आहे.
जालना शहरातील नवीन मोंढ्यात मोसंबी मार्केटमध्ये मोसंबीची दररोज आवक १५० ते २०० टन होत आहे. येथे मोसंबीचे दर प्रति टन १२ हजार ते १४ हजार रुपयां दरम्यान आहेत. पावसामुळे अनेक मोसंबी उत्पादकांना मोसंबी झाडावरुन तोडण्यास उशीर झाल्याने पिवळी मोसंबी बाजारात येत आहे. पिवळी मॉसबी जास्त दिवस टिकत नसल्याने या मोसंबीला बाहेरगावी पाठविण्यात अडचणी येत आहेत. स्थानिक बाजारातील ज्युस सेंटरसह जवळपासच्या बाजारात मोसंबी पाठविली जात आहे.
यंदा मोसंबीचे भाव तेजीज राहण्याची शक्यता वर्तविली जात होती. दरवर्षी नवरात्रामधे मोसंबीचे भाव मागणी वाढल्याने तेजीत असतात. मात्र यंदा पावसामुळे मोसंबीचे गणित बिघडले आहे.
सध्या मोसंबीचे भाव गुण वत्तेनुसार ३ हजार ते १४ हजार रुपये प्रति टन आहेत. विविध बाजार अहवालांनुसार काही वेळी १४,००० ते १७,००० रुपये व टन काहीवेळी १३,००० ते २०,००० रुपये प्रति टन असे भाव मिळतात. पावसामुळे मोसंबीचे मोठ्या प्रमाणात नुकसान झाले असल्याने मोसंबीचा दर्जा घसरला आहे.
मोंढ्यात दररोज १००-१२० मोसंबीची आवक होत आहे. नवरात्रात मागणी वाढल्यामुळे भावात वाढ होण्याची शक्यता होती. मात्र मोसंबीचे भाव वाढले नाहीत.
जालना मोंढ्यातुन बहुतांश माल उत्तरेतील दिल्ली, जयपूर, कोलकत्ता यांसारख्या बाजारात पाठवला जातो, त्यामुळे शेतकऱ्यांना काही प्रमाणात फायदा मिळतो.
अतिवृष्टीच्या गंभीर संकटामुळे मोठ्या प्रमाणावर मोसंबी फळगळ झाली आहे. बाजारात तुलनेने चांगल्या गुणवत्तेच्या मोसंबीला जास्त भाव मिळताना दिसतो. आगामी दहा ते पंधरा दिवसांनी पिवळा माल कमी होउन हिरवी मोसंबी वाजारात येण्याची शक्यता आहे. त्यानंतर काही प्रमाणात भावात वाढ होण्याची शक्यता व्यक्त केली जात आहे. उत्पादन घटल्यामुळे व बाजारातील अनिश्चिततेमुळे मोसंबी उत्पादक शेतकरी अडचणीत सापडला आहे.
जिल्ह्यात नुकत्याच झालेल्या अतिवृष्टीमुळे मोसंबीच्या झाडासह मोसंबी फळावर विविध रोगांचा प्रादुर्भाव झाला आहे. अनेक ठिकाणी फळगळ होत असतांनाच बुरशीचा प्रादुर्भावही झाला आहे. यामुळे मोसंबी उत्पादक शेतकरी अडचणीत सापडला आहे.
