जालना : जुना जालना भागातील साठे नगर येथे छुप्या पद्धतीने सुरू असलेल्या एका गावठी हातभट्टीच्या दारू अड्ड्यावर कदीम जालना पोलिसांनी छापा टाकून एका आरोपीला रंगेहाथ पकडले आहे. या कारवाईत पोलिसांनी 7 हजार रुपये किमतीची एकूण 70 लिटर हातभट्टीची दारू जप्त केली असून आरोपीविरुद्ध महाराष्ट्र दारूबंदी अधिनियमांतर्गत गुन्हा दाखल केला आहे.
सोमवार, दि. 1 रोजी कदीम जालना पोलिस ठाण्याचे पोलिस निरीक्षक शेवाळे यांच्या मार्गदर्शनाखाली पोलिस उपनिरीक्षक वाघ, पोलिस हवालदार राठोड आणि पोलिस कॉन्स्टेबल असे पथक पोलिस ठाण्याच्या हद्दीत पेट्रोलिंग करत होते.
या दरम्यान पोलिसांच्या गोपनीय बातमीदाराकडून एक महत्त्वाची माहिती मिळाली की, जुना जालन्यातील साठे नगर भागात असलेल्या एका पत्र्याच्या शेडमध्ये एक इसम बेकायदेशीरपणे गावठी हातभट्टीची दारू तयार करत आहे. माहिती मिळताच पोलिस पथकाने दोन पंचांना सोबत घेऊन रात्री 9 वाजेच्या सुमारास साठे नगर येथील संशयित पत्र्याच्या शेडवर अचानक छापा टाकला.
या छाप्यादरम्यान पोलिसांना तिथे एक इसम मिळून आला. पोलिसांनी त्याची कसून चौकशी केली असता त्याने आपले नाव शेख अजहर शेख युसुफ (36 वर्षे, रा. वल्ली मामु दर्गा, नवा जालना) असे सांगितले.
आरोपीच्या ताब्यातून पोलिसांनी प्रत्येकी 35 लिटर क्षमतेचे दोन पांढऱ्या रंगाचे कॅन जप्त केले, ज्यामध्ये एकूण 70 लिटर गावठी हातभट्टीची दारू भरलेली होती. या जप्त केलेल्या दारूची अंदाजे किंमत 7,000 रुपये असल्याचे पोलिसांनी सांगितले. उर्वरित नाशवंत मुद्देमाल जागीच नष्ट करण्यात आला आहे. ही कारवाई कदीम जालना पोलिसांनी केली.
