परतूर : तालुक्यात सुरूमगाव तांड्यावर भजन सुरु असतानाच एका किर्तनकार महाराजांचा मृत्यू झाल्याची घटना घडली आहे. रामधन महाराज राठोड (वय : 60 वर्ष, रा.काकडा रामेश्वर तांडा, ता.जालना, जि. जालना) असं या महाराजांचं नाव आहे. तेराव्याचे भजन सुरु असतानाच महाराज अचानक कोसळले, यातच त्याचं निधन झाले आहे.
परतूर तालुक्यातील सुरूमगाव तांडा येथे बंजारा समाजाचे प्रसिद्ध प्रबोधनकार रामधन महाराज राठोड यांचे भजन सुरु होते. यावेळीच त्याचे हृदयविकाराच्या झटक्याने निधन झाले. प्रवचन आणि भजन कार्यक्रमा दरम्यान त्यांना अचानक हृदयविकाराचा झटका आला आणि ते जागीच कोसळले.
किर्तन ऐकण्यासाठी उपस्थितांनी त्यांना तातडीने दवाखान्यात नेण्याचा प्रयत्न केला. मात्र त्यांचा वाटेतच मृत्यू झाला. आपल्या प्रबोधन आणि कीर्तनातून पंचक्रोशीत प्रसिद्ध असलेल्या रामधन महाराजांच्या निधनाने शोककळा पसरली आहे.
