जालना : जालना-देऊळगाव राजा रोडवरील वाघरुळ शिवारात शुक्रवार, 1 मे रोजी दुपारी झालेल्या भीषण अपघातात एक जण ठार, तर दोन जण गंभीर जखमी झाल्याची घटना घडली आहे. मुरलीधर लाहोरे (54, रा. देऊळगाव राजा) असे या अपघातात ठार झालेल्या व्यक्तीचे नाव आहे. या अपघातामुळे परिसरात मोठी खळबळ उडाली असून, जखमींवर जवळच्या रुग्णालयात उपचार सुरू आहेत.
मिळालेल्या माहितीनुसार, 1 मे रोजी दुपारच्या सुमारास वाघरुळ शिवारात भरधाव वेगाने आलेल्या डाक पार्सलच्या बोलेरो गाडीने छोटा हत्तीला पाठीमागून जोरदार धडक दिली. ही धडक इतकी भीषण होती की, छोटा हत्ती गाडीने चक्क दोन पलट्या मारल्या; तर बोलेरो थेट रस्त्याच्या कडेला असलेल्या हॉटेलमध्ये घुसली.
यावेळी हॉटेलबाहेर उभ्या असलेल्या काही नागरिकांची मोठी धावपळ उडाली. सुदैवाने हॉटेलमधील इतर कोणाला इजा झाली नाही, मात्र या थरारक अपघातात एकाचा जागीच मृत्यू झाला.
छोटा हत्ती (एमएच 28, बीबी 1813) हे वाहन देऊळगाव राजाकडून जालन्याकडे येत असताना पाठीमागून आलेल्या भरधाव डाक पार्सल बोलेरोने (एमपी 09, एजी 8952) या वाहनाला जोरदार धडक दिली. घटनेची माहिती मिळताच पोलिसांनी घटनास्थळी धाव घेत पंचनामा केला असून, दोन्ही वाहनांचे मोठे नुकसान झाले आहे.
नागरिकांनी दिला चोप
अपघातानंतर संतापलेल्या स्थानिक नागरिकांनी बोलेरो चालकासह दोघांना पकडून चांगलाच चोप दिला. घटनेची माहिती मिळताच स्थानिक नागरिकांनी जखमींना वाहनाबाहेर काढून रुग्णवाहिकेद्वारे जालन्यातील शासकीय रुग्णालयात दाखल केले.
