भोकरदन : तालुक्यातील हसनाबाद पोलिसांनी लोणगाव शिवारातील जुगार अड्ड्यावर छापा टाकून पाच जणांवर कारवाई करीत त्यांच्याकडून रोख रक्कम, मोबाईल फोन, दुचाकी व जुगार साहित्य असा ३ लाख १७ हजार ६०० रुपयांचा मुद्देमाल जप्त केला आहे.
लोणगाव गावाजवळील एका मोकळ्या जागेत काही जण जुगार खेळत असल्याची माहिती मिळाल्यानंतर पोलिसांनी छापा टाकला. या कारवाईत नारायण रमेश बारवकर, पांडुरंग बबन राऊत, बाबासाहेब बाळाजी बारवकर , राहुल साहेबराव घिने आणि नारायण कुंडलिक साखरे (सर्व रा. लोणगाव, ता. भोकरदन) यांना ताब्यात घेण्यात आले.
त्यांच्या ताब्यातून रोख रक्कम, विविध कंपन्यांचे मोबाईल फोन, मोटारसायकली तसेच जुगाराचे साहित्य जप्त करण्यात आले. याप्रकरणी पोलिस कॉन्स्टेबल अविनाश मांटे यांच्या फिर्यादीवरून हसनाबाद पोलिस ठाण्यात महाराष्ट्र जुगार प्रतिबंधक कायद्यान्वये गुन्हा दाखल करण्यात आला आहे. हा गुन्हा २२ जून रोजी नोंदविण्यात आला.
यांनी केली कारवाई
ही कारवाई पोलिस अधीक्षक तेजबीर सिंग संधू, अपर पोलिस अधीक्षक विक्रम साळी आणि उपविभागीय पोलिस अधिकारी नितीन कटेकर यांच्या मार्गदर्शनाखाली सपोनि योगेश जावळे, मपोउपनि अर्चना भोसले, पोलिस कॉन्स्टेबल अविनाश मांटे, हरीभाऊ शिरसागर आणि मेवा नागलोत यांच्या पथकाने केली.
