Gaurai welcomed with simplicity amidst the shadow of drought
पारध, पुढारी वृत्तसेवा : गणरायाच्या आगमनानंतर सर्वांचे लक्ष लागून राहिलेल्या गौराईचे पारधला घरोघरी पारंपरिक पद्धतीने स्वागत करण्यात आले. यानिमित्ताने महिलांमध्ये उत्साहाचे वातावरण असले, तरी यंदाच्या दुष्काळी परिस्थितीची झळ सणालाही बसल्याचे चित्र पाहायला मिळत आहे.
पारध येथील तबडे परिवारात भाग्यश्री तबडे व नवनीता तबडे यांच्या घरी गौराईचे मोठ्या भक्तिभावाने आगमन झाले. घराची स्वच्छता, आकर्षक रांगोळी आणि पारंपरिक पद्धतीने गौराईची पूजा-अर्चा करून तिचे स्वागत करण्यात आले. गौराईच्या आगमनाने घरातील वातावरण भक्तिमय झाले असून, महिलांनी मनोभावे आरती करून सुख-समृद्धीची प्रार्थना केली.
मात्र, यंदा परिसरात पावसाने अपेक्षित साथ न दिल्याने खरीप हंगाम संकटात आला आहे. पिकांची अवस्था बिकट असून शेतकऱ्यांच्या हातात पैसा नसल्याने गौराईच्या सणावरही आर्थिक संकटाची छाया दिसून येत आहे. दरवर्षी थाटामाटात साजरा होणारा उत्सव यंदा अनेक कुटुंबांकडून साधेपणाने साजरा केला जात आहे.
