Dr. Bhagwat Karad: Will contest the N.P. elections on his own
अंबड, पुढारी वृत्तसेवाः भाजपा अंबड नगर परिषदेची निवडणूक स्वबळावर लढविणार असल्याची माहीती माजी केंद्रीय राज्यमंत्री डॉ. भागवत कराड यांनी पत्रकार परिषदेत बोलतांना दिली.
जालना जिल्ह्याचे निवडणूक प्रभारी माजी केंद्रीय राज्यमंत्री डॉ. भागवत कराड यांनी माजी आमदार विलास खरात यांच्या निवासस्थानी शनिवारी अंबड येथे पत्रकार परिषद घेतली. यावेळी कराड म्हणाले की, आगामी स्थानिक स्वराज्य संस्थेच्या निवडणुकीच्या पार्श्वभूमीवर मुख्यमंत्री देवेंद्र फडणवीस यांच्या नेतृत्वात ३६ जिल्ह्यात पक्षाने १ प्रभारी नेमला आहे.
त्यात माझ्यासह जालना जिल्हा शहरासाठी माजी आ. कैलास गोरंट्याल यांची नेमणूक करण्यात आली आहे. अंबड नगर परिषदेसाठी ११ प्रभागासाठी २२ नगरसेवकांच्या निवडीसाठी ११७ इच्छुक उमेदवारांनी मुलाखती दिल्या असून नगराध्यक्ष पदाच्या सर्वसाधारण महिला राखीवसाठी २ इच्छुक महिलांच्याही मुलाखत घेण्यात आली असल्याची माहिती त्यांनी दिली.
दरम्यान यावेळी शहरातील निवडणुकीच्या पार्श्वभूमीवर राज्यात असलेल्या भाजपा, राष्ट्रवादी (अजित पवार गट) व शिवसेना (शिंदे गट) या युती धर्माचे अंबड नगर परिषदेच्या निवडणुकीत वाटाघाटी होणार का? या पत्रकारांच्या प्रश्नांना उत्तर देताना डॉ. कराड म्हणाले की, आमच्याकडे भरपूर इच्छुक उमेदवार आहेत, भाजपाने ५ लोकांच्या कोर कमिटी मार्फत सर्वे केला असून आ. नारायण कुचे व माजी आमदार विलास खरात यांच्यासह १७ ते१८ मुस्लिम बांधवांनी बूथ प्रमुखासाठी आमच्याकडे अर्ज दाखल केली आहेत.
अंबड शहरात तरी कोणत्याही प्रकारचा महायुतीधर्म पाळला जाणार नसून भाजप ही निवडणूक स्वबळावर स्वतंत्रपणे लढविणार असल्याचे त्यांनी सांगीतले. दरम्यान यावेळी आ. नारायण कुचे यांनी शहरातील नागरिकांचा विश्वास व भाजपाने केलेली कामे पाहता नगर पालीका निवडणुकीत नागरीक भाजपाला निवडून देणार आहेत. त्यामुळे अंबड नगर परिषदेवर भाजपचाच झेंडा आम्ही पुन्हा फडकवणार आहोत.
यावेळी कृषी उत्पन्न बाजार समितीचे संचालक श्रीराम नागरे, देविदास कुचे, विश्वजीत खरात, केदार कुलकर्णी, अॅड. वाल्मीक घुगे, तारेख चाऊस व शहराध्यक्ष सौरभ कुलकर्णी आदी उपस्थित होते.
पत्रकार परिषदेपुर्वी नगराध्यक्ष पदासाठी देवयानी केदार कुलकर्णी व ज्योतीताई दीपक ठाकूर या दोन इच्छुक उमेदवारांच्या मुलाखती आ. नारायण कुचे यांच्या कार्यालयात घेण्यात आल्या.
