हिंगोली; पुढारी वृत्तसेवा : येथील कृषी उत्पन्न बाजार समितीच्या यार्डात सोमवारी तब्बल 10 हजार क्विंटल हळदीची आवक झाली. परंतू, हळदीचे दर तब्बल 1 हजाराने गडगडले. परिणामी हळद विक्रीसाठी घेऊन येणार्या शेतकर्यांचे चेहरे हिरमुसल्याचे दिसून आले. सोमवारी आलेल्या हळदीचे मोजमाप दोन दिवसांत होणार असल्याने शेतकर्यांना मोंढ्यात मुक्काम करावा लागणार आहे. (Hingoli APMC News)
गत आठवड्यात हळदीला कमीत कमी 13 तर जास्तीत जास्त 16 हजार रूपये प्रतिक्विंटलचा दर मिळाला होता. परंतू, सोमवारी हळदीची मोठ्या प्रमाणात आवक झाली. रविवारी सकाळपासूनच हळद घेऊन आलेल्या वाहनांच्या रांगा लागल्या होत्या. जवळपास 300 वाहनांचा यामध्ये समावेश होता. सोमवारी 11 वाजता हळदीच्या लिलावाला सुरूवात झाली. हळदीला 12 हजार 500 ते 14 हजार 500 पर्यंत दर मिळाला. सरासरी 13 हजार रूपये दर मिळाल्याचे दिसून आले. यंदा हळदीच्या उत्पादनात घट झाली आहे. गतवर्षीच्या तुलनेत ही घट 30 टक्क्यांपर्यंत असल्याने हळदीचे दर तेजीत राहतील, असे बोलले जात असताना सोमवारी 1 हजार रूपयांने दर गडगडल्याने हळद उत्पादक शेतकर्यांच्या चिंता वाढल्या आहेत. हळदीला किमान 16 ते 17 हजार रूपये प्रतिक्विंटल दर मिळणे अपेक्षित आहे. परंतू, सध्यातरी हळदीला 13 ते 14 हजार रूपये प्रतिक्विंटलच्या आसपास दर मिळत आहे.
गतवर्षी हळदीला मिळालेल्या समाधानकारक दरामुळे चालू हंगामात हळदीच्या लागवड क्षेत्रात वाढ झाली होती. परंतु, अतिवृष्टी व बुरशीजन्य रोगाच्या प्रादुर्भावामुळे उत्पादनात घट झाली. परंतु, काही प्रमाणात हळदीला तेजी असल्याने पुढल्या वर्षीही हळदीला चांगले दर राहतील, या अपेक्षेने शेतकर्यांनी पुढील हंगामाच्या हळद लागवडीसाठी बेणे खरेदी केले आहे. त्यामुळे यंदा जवळपास 70 हजार हेक्टर क्षेत्रावर हळदीची लागवड होईल, असा अंदाज व्यक्त होऊ लागला आहे.
