Illegal Liquor Case
उमरगा: तालुक्यातील पळसगाव तांडा तलावालगत सुरू असलेल्या दोन गावठी दारूच्या अड्डयावर शनिवारी, (दि ८) सकाळी सात ते साडे आठच्या सुमारास पोलिसांनी छापा टाकला. छाप्यात सुमारे २ लाख ३५ हजारांचा मुद्देमाल जप्त करीत अड्डे उध्वस्त केले. याप्रकरणी उमरगा पोलिसांत दोघा विरोधात गुन्हा दाखल करण्यात आला आहे.
याबाबत पोलिसांनी दिलेल्या अधिक माहिती नुसार, पळसगाव तांडा येथे तलावालगत गावठी दारूचे अड्डे सुरू असल्याची गुप्त माहिती पोलिसाना मिळाली. यानुसार पोलीस उपअधीक्षक सदाशिव शेलार व पोलीस निरीक्षक प्रल्हाद सुर्यवंशी यांच्या मार्गदर्शनाखाली कारवाईचे नियोजन करण्यात आले. शनिवारी सकाळी पोलीस उपनिरीक्षक गजानन पुजरवाड, पांडुरंग कन्हेरे, पोहेकॉ अतुल जाधव, अनुरूद्र कावळे, नवनाथ भोरे, श्रीकांत चौधरी, बाबासाहेब कांबळे आदि कर्मचार्यांनी पोलीस वाहने रोडवर उभी करून तलावाच्या दिशेने पायवाटेने चालत जाऊन पळसगाव पाझर तलावाजवळ सुरू असलेल्या गावठी दारू अड्डयावर धाड टाकली.
या धाडीत ३ हजार लिटर गुळ मिश्रीत रसायन, १२० हातभट्टी दारू व साहित्यासह १ लाख ३२ हजाराचा तर जवळच असलेल्या दुसऱ्या दारूच्या अड्डयावरील धाडीत २ हजार २०० लिटर गुळ मिश्रीत रसायन, १२० लिटर हातभट्टी दारू व साहित्यासह १ लाख ३०० रुपये असा दोन्ही छाप्यातील मिळून २ लाख ३५ हजारांचा मुद्देमाल जप्त करीत जागेवर नष्ट केला. दरम्यान पोलिसाचे पथक येत असल्याचा सुगावा लागताच जयचंद लक्ष्मण राठोड व संजय उमाजी राठोड (रा दोघेही पळसगाव तांडा) हे झाडा झुडुपांचा फायदा घेत घटना स्थळावरून प्रसार झाले. या दोन्ही प्रकरणी पोलिस नाईक बाबासाहेब कांबळे व पोहेकॉ श्रीमंत चौधरी यांनी दिलेल्या वेगवेगळ्या फिर्यादीवरुन उमरगा पोलिसांत गुन्हा दाखल करण्यात आला आहे.
उमरगा पोलिसांनी पळसगाव तांडा येथे टाकलेल्या दोन्ही ठिकाणच्या धाडीत दोनशे लिटर क्षमतेच्या वेगवेगळ्या आकाराच्या बॅरल व त्यामधील मध्ये गुळ मिश्रीत रसायण, प्लॅस्टिकच्या घागरीतील हातभट्टी दारू, दारु बनविण्याचे साहित्य, साधने, लोखंडी ड्रम आदी सर्व मिळून २ लाख ३५ हजार रुपये किंमतीचा मुद्देमाल जागेवर नष्ट करीत गावठी दारू अड्डे उद्धवस्त केले.
