धाराशिव : येरमाळा येथील येडेश्वरी यात्रेदरम्यान महिला भाविकांच्या गळ्यातील मंगळसूत्र चोरी करणाऱ्या टोळीला स्थानिक गुन्हे शाखेने अटक केली आहे. 3 एप्रिल रोजी ही कारवाई करण्यात आली.
पोलिस निरीक्षक विनोद इज्जपवार यांच्या आदेशानुसार धाराशिव स्थानिक गुन्हे शाखेचे पथक यात्रेतील गर्दीच्या ठिकाणी पायी गस्त घालत होते. यावेळी गुप्त माहितीदारामार्फत आमराई परिसरातील मंदिराजवळ दोन महिला व एक पुरुष संशयास्पद हालचाली करत असल्याची माहिती मिळाली.
पथकाने तत्काळ त्या ठिकाणी जाऊन संशयितांवर पाळत ठेवली. गर्दीत ते चोरी करण्याच्या तयारीत असल्याचे लक्षात येताच त्यांना ताब्यात घेण्यात आले. सुरुवातीला समाधानकारक उत्तरे न दिल्याने त्यांना येरमाळा पोलीस ठाण्यात आणून सखोल चौकशी करण्यात आली.
चौकशीदरम्यान आरोपींची नावे अनिल शेषेराव शिंदे (वय 34), सुनिता अनिल शिंदे (वय 29) आणि हिराबाई रमेश शिंदे (वय 40, सर्व रा. इंदिरानगर, पाथरी, जि. परभणी) अशी असल्याचे निष्पन्न झाले.पंचांच्या उपस्थितीत अंगझडती घेतली असता अनिल शिंदे याच्या पँटच्या खिशातून चार वेगवेगळे सोन्याचे मंगळसूत्र आढळून आले. त्याची किंमत सुमारे 1 लाख 31 हजार रुपये इतकी आहे.
चौकशीदरम्यान आरोपींनी कबुली दिली की, यात्रेदरम्यान अंघोळीसाठी व्यवस्था असलेल्या ठिकाणी महिला अंघोळ करत असताना त्यांच्या गळ्यातील दागिने चोरी करून ते अनिल शिंदे याच्याकडे देत असत. जप्त करण्यात आलेले सर्व दागिने पोलिसांनी ताब्यात घेतले असून पुढील तपास सुरू आहे. ही कारवाई पोलीस निरीक्षक विनोद इज्जपवार, सहाय्यक पोलीस निरीक्षक सचिन खटके तसेच त्यांच्या पथकाने पार पाडली.
