Young man sets old woman's house on fire
छत्रपती संभाजीनगर, पुढारी वृत्तसेवा घरातून बाहेर जा, मला माझ्या मुलीकडे जायचे आहे, असे म्हटल्याचा राग आल्याने एकाच इमारतीत भाड्याने राहणाऱ्या तरुणाने वृद्ध महिला बाहेर जाताच तिचे घर पेटवून दिले. हा धक्कादायक प्रकार बुधवारी (दि.१९) रात्री पावणेअकरा ते अकरा वाजेदरम्यान तारकस गल्ली, बेगमपुरा भागात घडला.
मयूर शिवप्रसाद शर्मा (३२, रा. तारकास गल्ली) असे आरोपीचे नाव आहे. फिर्यादी शांताबाई आसाराम शिंदे (७०) या संजय राठोड यांच्या इमारतीत भाड्याने पहिल्या मजल्यावर नातू हृतिक सांबळे सोबत राहतात. तर ग्राउंड फ्लोरवर शिवप्रसाद ओमकारलाल शर्मा हे त्यांचा मुलगा मयूर सोबत भाड्याने राहतात.
बुधवारी रात्री पावणेअकराच्या सुमारास शांताबाई घरात काम करत असताना आरोपी मयूर घरात आला. आई जेवण झाले का, असे म्हणत गप्पा मारू लागला. परंतु शांताबाई यांना मुलीकडे जायचे असल्याने त्यांनी मयूरला घरातून बाहेर जा, मला मुलीकडे जायचे आहे, असे म्हटले. त्यावर मयूरने राग आल्याने, म्हतारे निघ इथून, तू गेली की मी तुझे घर जाळतो, अशी धमकी दिली.
त्याच्याकडे दुर्लक्ष करून शांताबाई मुलगी वंदना इथापे (रा. ढिंबरगल्ली, बेगमपुरा) हिच्याकडे निघून गेल्या. पंधरा मिनिटांत रात्री अकराच्या सुमारास वंदना यांना गल्लीतील एकाने फोन करून तुमच्या आईच्या घराला आग लागल्याची माहिती दिली. शांताबाईसह सर्वांनी धाव घेतली. अग्निशमन व पोलिसांना बोलावून घेतले. लोकांच्या मदतीने आग विझवली. घटनेत त्यांचे २५ हजारांचे नुकसान झाले. याप्रकरणी बेगमपुरा पोलिस ठाण्यात गुन्हा दाखल करण्यात आला आहे.
