वाळूज महानगर : छत्रपती संभाजीनगरमधून एक धक्कादायक घटना समोर आली आहे. प्रेमसंबंधातून उद्भवलेल्या वादातून प्रियकराच्या पत्नीची निर्घृण हत्या करण्यात आली आहे. वाळूज परिसरातील बजाजनगर येथे ही घटना घडली असून शहरात मोठी खळबळ उडाली आहे. वाळूज महानगरातील बजाजनगर परिसरात आज सकाळी एका 40 वर्षीय महिलेची अत्यंत क्रूरपणे हत्या करण्यात आल्याची घटना उघडकीस आली.
काय होते प्रकरण
प्राथमिक माहितीनुसार, आरोपी महिला आणि मयत महिलेच्या पतीमध्ये अनैतिक संबंध होते. या संबंधाला साधना सोनपेटकर यांनी विरोध केल्यामुळे दोघींमध्ये वारंवार वाद होत होते. याच वादातून हा खून केल्याची शक्यता पोलिसांकडून व्यक्त करण्यात येत आहे.
मुलाला कंपनीत कामाला लावायचे आहे अशी थाप मारून घरात घुसलेल्या एका महिलेने दाराला आतून कुलूप लावून बंदुकीचा धाक दाखवून सासूच्या डोळ्यासमोर सुनेचा चाकूने गळा चिरून खून केल्याची घटना बुधवारी (दि.२२) सकाळी सिडको वाळूज महानगरातील साई श्रद्धा पार्क येथे घडली. साधना महेंद्र सोनपेटकर (४४ रा. प्लॅट नंबर- १७, साई श्रद्धा पार्क, सिडको वाळूज महानगर) असे खून झालेल्या महिलेचे नाव असून शैलजा सुनील सोनार असे खून करणाऱ्या महिला आरोपीचे नाव आहे. या घटनेदरम्यान झटापट झाल्याची शक्यता असून आरोपी महिलाही किरकोळ जखमी झाली आहे. तिला उपचारासाठी घाटी रुग्णालयात दाखल करण्यात आले आहे. आरोपी महिला ही पिस्तूल आणि चाकू घेऊन मयत साधना यांच्या घरी गेली होती.
या विषयी मिळालेल्या माहितीनुसार, महेंद्र सोनपेटकर यांचे वाळूज एमआयडीसीत टूल शॉप असून पत्नी साधना, आई केशरबाई मुलगा दर्शन असे चौघे साई श्रद्धा पार्कमध्ये राहतात. तर त्यांचा मोठा मुलगा अभिषेक हा सोलापूर येथे इंजिनिअरिंगचे शिक्षण घेत आहे. आज सकाळी महेंद्र व त्यांची पत्नी लगतच्या मंदिरात दर्शनासाठी तर मुलगा दर्शन हा शाळेत गेला होता. केसरबाई या घरात एकट्या असतांना शैलजाही घरात आली.
घरातील इतर लोक कुठे गेले आहेत अशी विचारणा करून तिने मुलाला कंपनीत लावायचे आहे अशी थाप मारली. सकाळी साडेनऊ वाजेच्या सुमारास साधना या मंदिरातून घरी परतताच शैलजाने दाराला आतून कुलूप लावून घेतले. व ती साधना यांच्यासोबत वाद घालू लागली. यावेळी केसरबाई यांनी मध्यस्थी करण्याचा प्रयत्न केला. मात्र शैलेजाने त्यांना बेडवर ढकलून देत बंदुकीचा धाक दाखवून तिने साधना यांच्या गळ्यावर चाकूने सपापसाप वार केले. साधना या रक्ताच्या थारोळ्यात निचपीत पडल्यानंतर देखील शैलेजाने त्यांच्या अंगावर चाकूने अनेक वार केले. दरम्यान केसरबाई यांनी प्रसंगावधान राखून बाजूला पडलेली बंदूक उचलून ती खिडकीतून फ्लॅटच्या खाली फेकून दिली.
घरात आरडा ओरडण्याचा आवाज ऐकून शेजाऱ्यांनी याची माहिती महेंद्र तसेच पोलिसांना दिली. घटनेची माहिती मिळताच पोलीस उपनिरीक्षक प्रदीप शेवाळे, जमादार विशाल पाटील, पोलिस अंमलदार जयेश साळुंके, मनोज बनसोडे आदींनी वेळीच घटनास्थळी धाव घेवून दरवाजा तोडून आरोपी शैलजा सोनार हिला ताब्यात घेतले. केसरबाई यांनी पोलिसांना दिलेल्या जबाबात शैलेजाने चाकूने वार करत माझ्या डोळ्यासमोर माझ्या सुनेचा खून केल्याचे सांगितले. दरम्यान पोलीस उपायुक्त पंकज अतुलकर, सहाय्यक पोलीस आयुक्त डॉ. भागिरथी पवार, पोलिस निरीक्षक रामेश्वर गाडे यांनी घटनास्थळी भेट देऊन घटनेची माहिती घेतली.
