Welcome the birth of a girl!
छत्रपती संभाजीनगर, पुढारी वृत्तसेवा: स्त्री जन्माचे स्वागत करा, या विषयावर महानगरपालिका व जिल्हा रुग्णालयाच्या संयुक्त विद्यमाने आयोजित कार्यशाळेतून स्त्री-पुरुष समानतेचा प्रभावी संदेश देण्यात आला. भारतरत्न मौलाना अबुल कलाम आझाद संशोधन केंद्र येथे रविवारी (दि.१२) हा उपक्रम पार पडला.
महानगरपालिका व जिल्हा रुग्णालयाच्या संयुक्त विद्यमाने आयोजित स्त्री जन्माचे स्वागत करा, या विषयावर रविवारी कार्यशाळेचे आयोजन करण्यात आले होते. महापौर समीर राजुरकर, उपमहापौर राजेंद्र जंजाळ व आयुक्त अमोल येडगे यांच्या मार्गदर्शनाखाली वैद्यकीय आरोग्य अधिकारी डॉ. पारस मंडलेचा यांच्या नेतृत्वात ही कार्यशाळा आयोजित करण्यात आली होती.
यावेळी डॉ. सुधा कांकरिया यांनी पीसीपीएनडीटी व एमटीपी कायद्यांतर्गत स्त्री भ्रूणहत्या प्रतिबंध, स्त्री-पुरुष समानतेचे महत्त्व आणि महिलांच्या - सशक्तीकरणाबाबत सखोल मार्गदर्शन केले, तर आरोग्य समिती सभापती डॉ. सुनीता सोळुंके, विविध वैद्यकीय अधिकारी तसेच आशा सेविका मोठ्या संख्येने उपस्थित होत्या.
लिंग निदानाची माहिती देणाऱ्यास १ लाखाचे बक्षीस
गर्भधारणा पूर्व व प्रसवपूर्व निदान तंत्रे (लिंग निवडीस प्रतिबंध) कायदा १९९४ अंतर्गत शासनाची खबरी योजना कार्यान्वित आहे. बेकायदेशीर गर्भलिंग निदान किंवा गर्भपाताबाबत तक्रार नोंदवून त्यावर कारवाई यशस्वी झाल्यास तक्रारदारास १ लाख रुपयांपर्यंत बक्षीस दिले जाते. तक्रारदाराची ओळख गोपनीय ठेवली जाते. तक्रार टोल-फ्री क्रमांक १८००२३३४४७५ / १०४, संकेतस्थळ किंवा लेखी स्वरूपात करता येते.
