Stock of empty gas cylinders in a closed company
वाळूज महानगर, पुढारी वृत्तसेवा आंतरराष्ट्रीय स्तरावर सुरू असलेल्या युद्धपरिस्थितीचा परिणाम इंधन पुरवठ्यावर होत असल्याचे दिसून येत आहे. वालूज महानगरात घरगुती गॅस सिलिंडरच्या टंचाईची शक्यता निर्माण झाल्याच्या पार्श्वभूमीवर एमआयडीसी प्रशासनाने तपास मोहीम हाती घेतली.
या दरम्यान मंगळवारी (दि. १७) औद्योगिक क्षेत्रातील एका बंद कंपनीत विविध कंपन्यांचे शेकडो रिकामे गॅस सिलिंडर आढळून आले.
एमआयडीसी क्षेत्रातील बंद कारखाने, मोकळी भूखंडे तसेच ज्या ठिकाणी उद्योग सुरू झालेले नाहीत अशा जागांची तपासणी सुरू आहे. काही ठिकाणी केवळ इमारती उभारून प्रत्यक्ष उद्योग सुरू नसल्याचेही निदर्शनास आले आहे.
याच अनुषंगाने प्रशासनाने सर्वेक्षण मोहीम राबविली आहे. तपासादरम्यान सी-८७/८८ येथील एका बंद कंपनीत भारत गॅस, एचपी गॅस, गो गॅस तसेच इतर कंपन्यांचे घरगुती व व्यावसायिक वापरातील मोठ्या प्रमाणावर रिकामे सिलिंडर साठवलेले आढळले.
हे सिलिंडर अलीम सलीम सय्यद (रा. प्रियदर्शनी कॉलनी, छत्रपती संभाजीनगर) यांच्या मालकीचे असल्याचे समोर आले.
