Sambhajinagar Sanjay Shirsat on Money Bag and Dj Ban
छत्रपती संभाजीनगर, पुढारी वृत्तसेवा : डीजेपेक्षा चाळीसगाव, वैजापूरचा बँड लावा. पैसे कमी पडले तर आम्ही सगळे नेते आहेतच. काही नाही जमले तर मी तर आहेच. माझी बॅग उघडीच आहे, असे पालकमंत्री संजय शिरसाट यांनी म्हणताच एकच हशा पिकला. रविवारी (दि. २४) शांतता समितीच्या बैठकीत संजय शिरसाट यांनी तुफान फटकेबाजी करत टीकाकारांना प्रतिउत्तर दिले.
त्यांच्या नोटांच्या व्हायरल व्हिडिओबाबतही भाष्य केले. ते म्हणाले, व्हिडिओ चालत राहतील. शिरसाट याची चिंता करतो का? उलट लोक आपल्याला करोडपती समजत असेल तर आपल्या बापाचे काय जाते? माझा हा डायलॉगही फेमस झाला आहे, असे शिरसाटांनी म्हटल्याने पुन्हा चर्चेला उधाण आले आहे.
शिरसाट पुढे म्हणाले की, कितीही वाटोळे झाले तरी कार्यकर्ता दुखावला नाही पाहिजे, ही भूमिका नेतेमंडळी घेत असल्यानेच डीजेचा दणदणाट सुरू आहे, अशी कबुलीच पालकमंत्री संजय शिरसाट यांनी दिली. काही लोकांना वाईट वाटेल, पण ही वस्तुस्थिती असल्याचे सांगून शिरसाट यांनी एक किस्सा सांगून डीजेमुळे किती धोका आहे याची आपबिती सांगितली.
शिरसाट म्हणाले की, माझा एक कार्यकर्ता आला. त्याने तोंडभरून कौतुक केले. कार्यकत्याने पुण्याहून ८ लाखांचा डीजे आणला व तिथे मला बोलावले. माझ्यासाठी १०० किलोंचा फुलांचा हार आणला. मला वाटले माझ्या वजनापेक्षा जास्त वजनाचा तो हार गळ्यात टाकून फाशी देतो की काय? अंबादास दानवे देवा शप्पथ सांगतो, माझ्या हृदयाचे ठोके वाढले होते. त्या डीजेचा एवढा आवाज की, मी तिथे खालपासून वरपर्यंत थरथरत होतो. डीजेमुळे मी तेथून कधी निघतो, अशी माझी अवस्था झाली होती. त्यामुळे डीजे वापरू नका, असा किस्सा शिरसाटांनी सांगितला.
शिरसाट पुढे म्हणाले, सर्व गणेश मंडळाचे अध्यक्षांना माझा आव्हान आहे डीजे बंद ठेवा. माझ्याकडे एक व्यक्ती आला तो म्हणाला सुप्रीम कोर्टाचा आदेशावरून पोलिसांनी भोंगे उतरवले. तुम्ही डीजेबद्दल काय करणार सांगा. त्यामुळे भोंगे उतरवल्यानंतर आता काही लोक वाद कसा पेटेल यासाठी प्रयत्न करत आहेत. शहरातील शांतात बिघडविण्याचा प्रयत्न आहे. त्यामुळे डीजे लावू नका, मी गणेश मंडळाच्या अध्यक्षांना आवाहन करतो, असे संजय शिरसाट म्हणाले.
