Revenue department takes action against sand mafia
सिल्लोड, पुढारी वृत्तसेवा :
सिल्लोड तालुक्यात गेल्या काही काळापासून बिनधास्त सुरू असलेल्या अवैध वाळू उपशावर अखेर महसूल प्रशासनाने करडी नजर टाकत ठोस कारवाईचा बडगा उगारला आहे. गेल्या दोन दिवसांत सिल्लोड महसूल विभागाच्या विशेष पथकाने विविध ठिकाणी छापे टाकून तब्बल ९२२ ब्रासपेक्षा अधिक अवैध वाळू साठा जप्त केला असून, या साठ्याची अंदाजे किंमत २ कोटी ८३ लाख ३९ हजार २०० रुपये इतकी असल्याची माहिती तहसीलदार संजय देवरे यांनी दिली.
ही व्यापक कारवाई तहसीलदार संजय देवरे यांच्या नेतृत्वाखाली मंडळ अधिकारी काशिनाथ ताठे व त्यांच्या पथकाने केली. या कारवाईमुळे वाळूमाफियांच्या गोटात प्रचंड खळबळ उडाली असून, कायद्याचा धाक पुन्हा एकदा ठळकपणे जाणवू लागला आहे. नदीपात्रांचे रक्षण आणि गौण खनिज संपत्तीचे संरक्षण हा प्रशासनाचा मुख्य उद्देश असल्याचेही स्पष्ट करण्यात आले आहे.
सिल्लोड शहरासह तालुक्यातील पूर्णा नदी, भवन, चिंचखेडा, केरहाळा, धानोरा आदी परिसरात चोरट्या मागनि वाळू उपसा व वाहतूक होत असल्याच्या तक्रारी वाढत होत्या. नदी पात्रात मोठमोठे खड्डे पडून पर्यावरणाचे गंभीर नुकसान होत असून, नागरिकांच्या सुरक्षिततेचा प्रश्न निर्माण झाला आहे, अशी भावना स्थानिक नागरिक व्यक्त करीत आहेत. त्यामुळेच महसूल विभागाने आता शब्द नव्हे तर कृती या भूमिकेतून कडक पावले उचलली आहेत.
ही कारवाई म्हणजे केवळ सुरुवात असून, कायद्याच्या चौकटीत राहूनच व्यापार करा अन्यथा परिणाम भोगा, असा स्पष्ट इशारा महसूल प्रशासनाने वाळूमाफियांना दिला आहे. नागरिकांनीही प्रशासनाला सहकार्य करून अवैध वाळू उपशाविरुद्धची लढाई अधिक बळकट करावी, अशी अपेक्षा व्यक्त होत आहे.
