Railways: Ticket checking drive underway
छत्रपती संभाजीनगर, पुढारी वृत्तसेवा : रेल्वेत फुकट्यांचा मोठ्या प्रमाणात सुळसुळाट असतो. ही बाब गांभीर्याने घेत प्रशासनाने यावर आळा घालण्यासाठी विशेष मोहीम राबवणे सुरू केले आहे. या विशेष मोहिमेत २६ मार्च रोजी एकाच दिवसात सुमारे ५०० जणांवर कारवाई करत ३ लाख ४२ हजार रुपयांची दंडासह रक्कम वसूल केली.
या विशेष मोहिमेत २८ तिकीट तपासणी कर्मचारी सहभागी झाले होते. विविध मार्गावरील २५ गाड्यांची तपासणी करण्यात आली. या तपासणीदरम्यान विनातिकीट प्रवास, अनियमित प्रवास तसेच अनबुक्ड सामान अशी ५०० प्रकरणे आढळून आली.
यांच्यावर रेल्वे नियमानुसार कारवाई करण्यात आली. यात ४४९ विनातिकीट, १५ अनियमित प्रवास, तसेच ३६ अनबुक्ड लगेज अशा एका दिवसात ५०० जणांकडून ३ लाख ४२ हजार ५८० रुपयांची दंडासहित रक्कम वसूल केली आहे.
प्रवाशांना आवाहन
सर्व प्रवाशांनी वैध तिकिटासह प्रवास करावा. तसेच प्रवासादरम्यान सोबत असलेले साहित्य नियमानुसार बुक करावे. विनातिकीट किंवा अनियमित प्रवास करणे हे रेल्वे कायद्यांतर्गत दंडनीय अपराध आहे. ही कारवाई टाळण्यासाठी प्रवाशांनी नियमांचे पालन करावे, असे आवाहन करण्यात आले आहे.
