Officials bring cashews and almonds and we are the ones who get defamed: Guardian Minister Shirsat
छत्रपती संभाजीनगर, पुढारी वृत्तसेवा शेतकरी संकटात असताना दुष्काळावरील बैठकीत काजू-बदाम अधिकारीच आणून ठेवतात. उद्या कोणाच्या अंत्ययात्रेतही हे काजू-बदाम आणून ठेवतील. अधिकाऱ्यांच्या अशा अक्कलशून्य कारभारामुळे बदनामी आमची होते. असा संताप जिल्ह्याचे पालकमंत्री संजय शिरसाट यांनी शनिवारी माध्यमांशी बोलताना व्यक्त केला.
पाऊसाने दडी मारल्याने मराठवाड्यासह राज्यात दुष्काळाचे संकट घोंगावत आहे. शेतातील पिके जळून गेल्याने शेतकरी हवालदिल झाला आहे. अशी विदारक परिस्थितीवर चर्चेसाठी नांदेडच्या जिल्हा नियोजन सभागृहात शनिवारी आयोजित विशेष बैठकीत चक्क नेते आणि वरिष्ठ अधिकारी काजू-बदामाचा खुराक घेत असल्याचा व्हिडिओ सोशल मीडियावर झाल्याने मोठी खळबळ उडाली. याबाबत माध्यम प्रतिनिधींनी विचारलेल्या प्रश्नांवर छत्रपती संभाजीनगर जिल्ह्याचे पालकमंत्री शिरसाट यांनी संताप व्यक्त करत अधिकाऱ्यांवर खापर फोडले.
कोणत्या वेळेला काय करावे, हे अधिकाऱ्यांना समजत नाही. त्यांनी थोडं डोकं वापरलं पाहिजे. बैठक कशासंदर्भात आहे, काय चालेल. याचे भान अधिकाऱ्यांनी ठेवले पाहिजे, असा सल्लाही शिरसाट यांनी दिला.
