छत्रपती संभाजीनगर : डॉ. बाबासाहेब आंबेडकर मराठवाडा विद्यापीठासह राज्यातील अकृषी विद्यापीठे व संलग्न महाविद्यालयांतील शिक्षकेतर कर्मचाऱ्यांच्या प्रलंबित मागण्यांकडे शासनाचे लक्ष वेधण्यासाठी महाराष्ट्र राज्य विद्यापीठीय व महाविद्यालयीन सेवक संयुक्त कृती समितीने आंदोलनाला सुरुवात केली असून, सलग दुसऱ्या दिवशी काळ्या फिती लावून काम केले. दुसऱ्या टप्प्यात राज्यव्यापी आंदोलनाचा इशारा राज्य कार्याध्यक्ष डॉ. कैलास पाथ्रीकर यांनी दिला.
आश्वासित प्रगती योजना तत्काळ लागू करा, २००५ नंतर नियुक्त कर्मचाऱ्यांना जुनी पेन्शन योजना लागू करा, शिक्षक पदभरतीप्रमाणेच अकृषी विद्यापीठे व संलग्न महाविद्यालयांतील रिक्त शिक्षकेतर पदे भरण्यास मंजुरी द्यावी. या व इतर मागण्यांसाठी १४ पासून टप्प्याटप्प्याने आंदोलन करण्यात येत आहे. १४ ते १६ मे दरम्यान काळ्या फिती लावून कामकाज केले. पुढील टप्प्यात १८ ते २० मे दरम्यान धरणे व निषेध सभा घेण्यात येणार आहेत.
आंदोलन तीव्र करणार विद्यापीठातील शिक्षकेतर कर्मचाऱ्यांच्या प्रलंबित मागण्यांसाठी कर्मचाऱ्यांनी गुरुवार व शुक्रवारी काळ्या फिती लावून काम केले. आंदोलनाच्या पार्श्वभूमीवर शुक्रवारी (दि.१५) दुपारी द्वारसभा घेण्यात आली. मागण्या मान्य होईपर्यंत आंदोलन चालू ठेवण्याचा निर्धार करण्यात आला. यावेळी डॉ. कैलास पाथ्रीकर, अनिल खामगावकर, मनोज शेटे यांच्यासह इतर पदाधिकारी उपस्थित होते.
