'No Entry' for DJs during the festive season; prohibitory orders in force in the city for two months
छत्रपती संभाजीनगर, पुढारी वृत्तसेवा : आगामी गणेशोत्सव, विसर्जन मिरवणुका आणि नवरात्रोत्सवाच्या पार्श्वभूमीवर शहरात कायदा व सुव्यवस्था तसेच ध्वनी प्रदूषण नियंत्रणात ठेवण्यासाठी पोलिस आयुक्त प्रवीण पवार यांनी मोठा दणका दिला आहे. सणांच्या काळात शहरात डीजे साऊंड सिस्टीमवर कडक बंदी घालण्यात आली असून, संपूर्ण पोलिस आयुक्तालय क्षेत्रात १८ नोव्हेंबरपर्यंत विशेष प्रतिबंधात्मक आदेश लागू करण्यात आले आहेत.
हे मनाई आदेश १९ सप्टेंबरच्या मध्यरात्रीपासून ते १८ नोव्हेंबरच्या मध्यरात्रीपर्यंत संपूर्ण आयुक्तालय क्षेत्रात लागू राहतील. या दोन महिन्यांच्या काळात शहरात गणेश मुर्ती विसर्जन मिरवणुका, गणेशोत्सव, धम्मचक्र प्रवर्तन दिन, घटस्थापना, दुर्गादेवी मूर्ती आगमन व विसर्जन आणि दसरा असे मोठे उत्सव साजरे होणार आहेत. या उत्सवांमध्ये डीजे साऊंड (टॉप, मिड, बेस अशी मल्टीस्पीकर सिस्टीम), प्लाझ्मा साऊंड सिस्टीम, प्रेशरमिड साऊंड सिस्टीम आणि थरावर थर लावण्यासाठी बदल केलेल्या वाहनांच्या वापरावर पूर्णपणे कडक बंदी घालण्यात आली आहे.
पोलिस आयुक्तांनी साऊंड सिस्टीमचे मालक, चालक आणि उत्सव मंडळांच्या आयोजकांना सक्त ताकीद दिली आहे. या सिस्टीम कोणत्याही सार्वजनिक ठिकाणी वापरण्यास किंवा इतरांना भाड्याने/वापरास देण्यास सक्त मनाई आहे. मालकांनी त्यांच्या ताब्यातील डॉल्बी, प्लाझ्मा सिस्टीम आणि त्यासाठी वापरली जाणारी मॉडिफाय केलेली वाहने स्वतःच्याच जागेवर 'सीलबंद' स्थितीत ठेवावीत, असे स्पष्ट निर्देश देण्यात आले आहेत.
या आदेशाचे उल्लंघन करणाऱ्या मंडळांवर किंवा साऊंड सिस्टीम मालकांवर भारतीय न्याय संहितेच्या कलम २२३ नुसार आणि प्रचलित कायद्यानुसार कडक कायदेशीर कारवाई केली जाईल. ध्वनिप्रदूषण नियम २००० मधील मर्यादेचे उल्लंघन न करणाऱ्या कायदेशीर आणि पारंपरिक साऊंड सिस्टीमला या अधिसूचनेतून वगळण्यात आले आहे.
