'MCOCA' blow to gang that snatched mangalsutras
छत्रपती संभाजीनगर, पुढारी वृत्तसेवा : शहरात सकाळ, संध्याकाळी बाहेर फिरायला जाणाऱ्या महिलांना लक्ष्य करून मंगळसूत्र, सोनसाखळी हिसकावणाऱ्या टोळीला पोलिस आयुक्त प्रवीण पवार यांनी मोठा दणका दिला आहे. आर्थिक फायद्यासाठी संघटित टोळी बनवून शहरात दहशत माजवणाऱ्या कुख्यात अमोल गलाटेसह टोळीतील ६ सराईत साथीदारांवर थेट 'मोक्का' अंतर्गत कारवाई करण्यात आली आहे.
या टोळीत ५० पेक्षा अधिक गुन्हे दाखल असलेला कुख्यात अमोल वैजिनाथ गलाटे (मुख्य सूत्रधार), मंगेश वाल्मीक शहाणे, शेख अल्ताफ शेख मुबारक, शेख सिराजुल हक शेख अन्वर अली, अमन महेबूब शेख आणि आदित्य अनिल काळे यांचा समावेश आहे, अशी माहिती गुन्हे शाखेचे पोलिस निरीक्षक गजानन कल्याणकर यांनी दिली.
या आरोपींनी आर्थिक फायद्यासाठी एक संघटित गुन्हेगारी टोळी तयार केली होती. रस्त्यावर शुकशुकाट असताना मॉर्निंग वॉकला जाणाऱ्या तसेच एकट्या दुकट्या महिलांना हे आरोपी टार्गेट करायचे. त्यांच्या गळ्यातील मंगळसूत्र, सोनसाखळी ओरबाडायचे. विरोध केला तर चाकू लावून लूटमार करायचे. महिलांमध्ये दहशत निर्माण करणाऱ्या या टोळीचे पोलिसांनी आता 'मोक्का' लावून कंबरडे मोडले आहे.
या सराईत टोळीविरुद्ध पुंडलिकनगर ठाण्यात जबरी चोरीचे विविध गुन्हे दाखल आहेत. आता या गुन्ह्यांमध्ये मोक्का कायद्याचे कलम समाविष्ट करण्यात आले आहे. या गंभीर प्रकरणाचा पुढील तपास सहायक पोलिस आयुक्त मनोज पगारे यांच्याकडे सोपवण्यात आला.
