Mantha police seize ten truckloads of concealed utensil sets
मंठा, पुढारी वृत्तसेवा : बांधकाम कामगारांच्या कल्याणार्थ असलेल्या योजनांवर सर्रासपणे डल्ला मारण्याचे काम सरकारी अधिकारी आणि दलालांच्या माध्यमातून होत आहे. ही बाब भांडी संच परस्पर विक्री केलेच्या आरोपात तत्कालीन सरकारी कामगार अधिकाऱ्यांना परतूर पोलिसांनी अटक केल्याने उजेडात आली. ही घटना ताजीच असताना पुन्हा बुधवार, दि. १२ रोजी मंठा पोलिस ठाण्याच्या हद्दीत लपवून ठेवलेले भांडी संचाचे १० ट्रक पोलिसांनी जप्त केले. यातील साहित्य पिंपरखेड येथील एजन्सीच्या दोन गोदामात सुरक्षित ठेवण्यात आले आहेत.
दरम्यान, इमारत व इतर बांधकाम कल्याणकारी मंडळाच्या माध्यमातून नोंदणीकृत बांधकाम कामगारांच्या कल्याणार्थ विविध कल्याणकारी योजना राबविण्यात येतात. त्याचाच एक भाग म्हणून घरगुती उपयोगाची भांडीसंच वाटप योजना आहे. मंठा पोलिस ठाण्याच्या हद्दीत घरगुती उपयोगाची भांडी व साहित्य असलेले दहा ट्रक चोरी करून लपवून ठेवण्यात आले होते. हे सर्व साहित्य पोलिसांच्या मदतीने ताब्यात घेण्यात आले आहे.
शासनाच्या मान्यतेनुसार हे सर्व साहित्य पिंपरखेड येथील एजन्सीच्या दोन गोडाऊनमध्ये ठेवण्यात येणार आहे. संस्थेचे अध्यक्ष आतिश राठोड यांच्या निगराणीखाली हे साहित्य सुरक्षित ठेवण्यात आले आहे. या गोडाऊनला पोलिसांचे स्वतंत्र लॉक व सील राहणार असून, साहित्य गोडाऊनमध्ये सुपूर्द केल्यानंतर त्याच्या सुरक्षिततेची संपूर्ण जबाबदारी संबंधित एजन्सीची राहणार आहे.
मंठा तालुक्यातील जनतेच्या हक्काचे साहित्य जनतेपर्यंत पोहोचवण्यासाठी आमदार बबनराव लोणीकर, मकरंद पाटील आणि पोलिस निरीक्षक पुरुषोत्तम देशमुख संयुक्त प्रयत्नातून ही मोहीम सुरू केली आहे. त्यामुळे सर्वसामान्य जनतेने कुठल्याही अफवांवर विश्वास ठेवू नये असे आवाहन करण्यात आले आहे.
भांडी जालन्याला जाऊ देणार नाही : आमदार लोणीकर
हे साहित्य मंठा तालुक्यातील जनतेसाठी मंजूर झालेले असल्याने ते जालन्याला नेण्याचा कोणताही प्रयत्न सहन केला जाणार नाही. हे भांडे जालन्याला जाऊ देणार नाही, अशी स्पष्ट भूमिका माजी मंत्री तथा आमदार बबनराव लोणीकर यांनी मांडली.
