Industries in Waluj should regularize their Gunthewari properties: G. Srikant
छत्रपती संभाजीनगर, पुढारी वृत्तसेवा : छत्रपती संभाजीनगर महानगर प्रदेश विकास प्राधिकरणाच्या हद्दीतील नागरिकांना कमी दरात बेटरमेंट चार्जेस भरून गुंठेवारी नियमित करण्याची संधी उपलब्ध करून देण्यात आली असून, वाळूज औद्योगिक परिसरातील उद्योजकांनीही त्यांच्या जमिनी व बांधकामे दिलेल्या मुदतीत नियमित करून घ्यावीत, असे आवाहन महानगर आयुक्त तथा विभागीय आयुक्त जी. श्रीकांत यांनी केले.
वाळूज येथील मराठवाडा असोसिएशन ऑफ स्मॉल स्केल इंडस्ट्रीज अँड अॅग्रिकल्चर (मासिआ) कार्यालयात शुक्रवारी आयोजित गुंठेवारी नियमितीकरण प्रक्रियेबाबत मार्गदर्शनपर चर्चासत्रात ते बोलत होते. यावेळी महानगर नियोजनकार हर्षल बाविस्कर, सहआयुक्त अंजली धानोरकर, उपमुख्य लेखा व वित्त अधिकारी साधना बांगर यांच्यासह उद्योजक उपस्थित होते.
पुढे जी. श्रीकांत म्हणाले, पायाभूत सुविधा उपलब्ध करून देण्यासाठी नियमबाह्य बांधकामांवर कारवाई करण्यात येणार असून, शासन नियमांनुसार ३१ डिसेंबर २०२० पूर्वीचीच विनापरवाना बांधकामे नियमित करुन त्यानंतरची बांधकामे हटविण्यात येतील. अभय योजनेंतर्गत १ मे ते ३१ जुलै २०२६ या कालावधीत बेटरमेंट चार्जेसवर १० टक्के शुल्क आकारले जाईल.
त्यानंतर १ ऑगस्ट ते ३१ ऑक्टोबर या कालावधीत ५० टक्के शुल्क आकारले जाईल, तर १ नोव्हेंबर २०२६ पासून पूर्ण शुल्क आकारण्यात येणार असल्याचे जी. श्रीकांत यांनी स्पष्ट केले.
उद्योजकांनी फक्त मॅसेज करावा, समाजकंटकांवर कारवाई
उद्योजकांच्या शंकांचे निरसन व अर्ज स्वीकृतीसाठी मसिआ कार्यालयात सीएमआडीएच्या अधिकाऱ्यांमार्फत मार्गदर्शन सुरू असल्याचेही त्यांनी सांगितले. तसेच समाजकंटकांकडून त्रास होत असल्यास उद्योजकांनी केवळ संदेशाद्वारे तक्रार करावी, संबंधितांविरुद्ध कठोर कारवाई केली जाईल, असेही त्यांनी स्पष्ट केले.
